ཆུ་བོ་དེ་ནི་ཀྱ་ཀྱུའི་ངང་ནས་འདི་རུ་བཞུར།།
མེ་ཏོག་དག་ཀྱང་འདབ་མ་གཡོ་བཞིན་འདི་ནས་སྐྱེས།།
སྔོ་ལྗང་བཀྲ་བའི་ཞིང་ཁམས་འདི་ནི་ང་ཚོའི་སྟེ།།
སེམས་ཀྱི་རྟོག་འགྱུ་ཡུན་གྱིས་བཞུར་བའི་མོན་ཡུལ་ལོ།།
ཤིང་ནགས་དག་གིས་བོད་ཀྱི་མི་ལ་གྲིབ་བསིལ་སྦྱིན།།
ཕུ་ཆབ་འདི་ཚོས་བོད་ཀྱི་མགྲོན་པོར་སྐོམ་གདུང་སེལ།།
ཕ་ཡུལ་བོར་བའི་མི་ཚོགས་དག་ལ་སྣེ་ལེན་གྱིས།།
བཙན་པའི་དུས་ཀྱི་དམག་བྲོ་དག་ཀྱང་འཁྲབ་བཞིན་འདུག།།
སྐད་ཀྱི་རོལ་མོ་དལ་གྱིས་དཀྲོལ་བའི་མོན་པ་ཚོས།
ང་ཅག་བོད་ལ་བརྩེ་བའི་འཛུམ་གྱིས་བསུ་ལེན་བྱེད།།
ཧི་མ་ལ་ཡའི་སྤྲིན་གྱི་རྒྱ་མཚོ་འཕྱུར་བའི་སར།།
བསམ་གཞིགས་སྟོང་གི་རི་མོ་འགུལ་བའི་དབྱངས་རྟ་ཆད།།
ལས་བརྩོན་ཞིང་འབྲོག་ལས་ལ་བྲེལ་བའི་གཤིས་ཀ་དང་།།
ཤ་རུས་གཅིག་པའི་གཉེན་ལ་དུངས་པའི་ངང་ཚུལ་འདིས།།
སྔོན་ཆད་བཙན་པོའི་དཔུང་གི་སྟོབས་ཤུགས་བསྒྱུར་བའི་མི།།
མི་ཡུལ་འདི་རུ་འདི་ལྟར་འཐོར་བར་སེམས་པ་སྨྲེང་།
བྱེའུ་ཆུང་ཅོ་ཀས་སྐད་བརྡ་བསྒྱུར་ཏེ་ཁམས་འདྲི་ཞུ།།
ན་ཆུང་གཞོན་མས་ཟུར་མིག་འཕེན་བཞིན་སྡོད་ཤོག་ཟེར།།
རང་ཡུལ་བོད་ལ་ཁོ་ཐག་འཚམས་འདྲི་ཆོད་ཡོང་གསུངས།།
རང་སེམས་འཁྱགས་པས་སླར་ཡང་དྲོད་ཅིག་འདི་ལྟར་རྙེད།།
རྒྱལ་བ་ཚངས་དབྱངས་ཆིབས་ཁ་བསྒྱུར་བའི་ལམ་དེ་ནས།།
བོད་ཀྱི་ཕྱོགས་ལ་རྒྱང་ལྟ་ཡང་ཡང་བྱས་པའི་ཚེ།།
སྤྲིན་དང་བསྡེབས་པའི་རི་བོ་ཞིག་གི་ཕང་བ་ནས།།
གསལ་ཞིང་སྙན་པའི་འབྲོག་གླུ་ལྷང་ལྷང་གྲགས་བཞིན་འདུག།།
20༡0.༨.༡2 ཉིན་མོན་རྟ་དབང་ནས་བྲིས།
བདེ་མོ། ཡོང་ནས་བཀླགས་ཡོད། མཁྱེན་རབ་ནས།
ReplyDelete