Saturday, September 3, 2011

རྒྱ་སྒོ་མེད་པའི་སེམས་པ་ཞིག་ལ།

ཀྱེ་མ་དེ་རིང་འཇིག་རྟེན་ཤིན་ཏུ་མཛེས།།

སྤྲིན་པའི་རྒྱུ་ཕྱོགས་འདི་ཡང་སྙིང་དུ་སྡུག།

སེམས་སོང་གྲོགས་པོ་ཁ་ཐག་རིང་ན་ཡང་།།

ཡར་རྒྱབ་སྤྲིན་པའི་འོག་ཏུ་ཐུག་གམ་སྙམ།།

མདང་ནུབ་རྨི་ལམ་ནང་དུ་ལྷན་འཛོམས་གནང་།།

ཡུན་རིང་སེམས་ཀྱི་སྐྱོ་སྡུག་རྫོགས་པར་བྱས།།

ཕན་ཚུན་མཐུན་པའི་སྐྱེས་ཀྱང་འདེགས་རེས་བྱས།།

དགའ་བའི་མཆུ་སྒྲོས་དེ་ཡང་སྦྱར་བ་རྨིས།།

ཨ་ཙི་ཟུར་མིག་ཞེ་དྲག་རྣོ་བ་ལ།།

ཨེ་མ་སྙིང་གཏམ་རྣ་བར་སྙན་པ་ལ།།

བདག་གི་ལུས་སེམས་ངལ་དུབ་སངས་ནས་ཐལ།།

ལོ་གསུམ་སྙིང་གི་རི་མོ་འགྲུབ་ནས་ཐལ།།

ད་ནངས་རྨི་ལམ་ཉི་མས་ཕར་ལ་བསྐྱལ།།

དྲན་པའི་རི་མོ་འོད་ཀྱིས་ནང་དུ་བཅུག།

སེམས་སོང་སྐྱ་རེངས་བུ་མོས་ཕར་ལ་བསུས།།

དྲན་པའི་དྲན་ཤིང་སླར་ཡང་སྙིང་ལ་བཙུགས།།

རྨི་ལམ་ཡིན་ཡང་ཚོར་བ་སྐྱིད་ནས་བྱུང་།།

མངོན་སུམ་མིན་ཡང་སེམས་པ་འགུལ་ཏེ་བྱུང་།།

མདང་སུམ་རྨི་ལམ་ནང་གི་བརྩེ་བ་དག།

དོ་ནུབ་ཡང་བསྐྱར་རྨི་བའི་སེམས་ཤིག་བསྐྱེད་ཡོད།།

ཡར་བལྟས་སྤྲིན་ཡང་སེམས་སོང་ཕྱོགས་ལ་འགྲོ།

སྒྲ་དབྱངས་དག་ཀྱང་སེམས་སོང་ཕྱོགས་ནས་གྲགས།།

སྤྲིན་པར་ལྟ་ཐེངས་རེ་ལ་སེམས་སོང་དྲན།།

སེམས་སོང་མི་དེའི་འཚོ་བ་སྐྱིད་དམ་བསམས།།

ལོ་ནི་རྒས་ཤིང་རྒས་ཤིང་མཇལ་ན་འདོད།།

མཇལ་དུང་སྙིང་གི་དཀྱིལ་ནས་འཁྱུད་ན་འདོད།།

ལུས་པོ་སེམས་ཀྱི་རྒྱབ་ཏུ་ལྷག་ན་ཡང་།།
སེམས་ཀྱི་ཟུར་ཞིག་སེམས་སོང་གམ་དུ་རྒྱུ།།

ཀྱེ་མ་འཇིག་རྟེན་འཁོར་བ་ཇི་འདྲའི་མཛེས།།

དེ་རིང་ཚོར་སྣང་དག་ཀྱང་ལྷག་ཏུ་རྒོད།།

སྤྲིན་གྱི་རི་མོ་དབང་བོའི་འཇའ་རིས་སོགས།།

ཐམས་ཅད་སྐད་དུ་བརྗོད་ན་བྱམས་པ་ཉིད།།

བཟའ་བ་ཁྱིམ་གཅིག་ལས་ཤིག་མེད་ཀྱང་དྲག།།

སེམས་པ་དུང་བའི་རྟེན་ཞིག་བྱས་ན་འགྲིག།

ལར་ནས་རང་གཞན་གཞོན་པའི་སྣང་བ་འདི།།

གྱེས་པའི་དུས་སུ་རྡོ་རྗེ་མདུད་པར་སྣང་།།

ང་ནི་དགའ་ཞིང་སྤྲོ་ཞིང་བྱམས་པ་བྲིས།།

ང་ནི་སྐྱིད་ཅིང་སྡུག་ཅིག་བྱམས་པ་གླེང་།།

ཐོག་མའི་དགའ་སྐྱོ་འཕྱུར་བའི་འཇིག་རྟེན་ན།།

ད་ནི་ཞེན་ས་བྱམས་པ་ཁྱེད་རང་ཙམ།།

ང་ནི་འདི་ལྟའི་མི་རྐྱང་སྐྱིད་པོ་ཞིག།

ང་ནི་འདི་འདྲའི་བཙུན་པ་ཁྲེལ་མེད་ཅིག།

མི་ཚེ་འདི་ཡི་ཕྱི་མཐའ་རྫོགས་པ་ན།།

ངོས་ཀྱིས་ཁྱེད་ཉིད་བསྣམས་ཏེ་སོང་ན་བསམས།།

ཞེ་དྲག་རིང་བོ་མི་འགོར་འཛོམས་ནས་ཡོང་།།

ཧ་ཅང་གདུང་བ་མི་དགོས་སྐྱིད་ནས་ཡོང་།།

མི་ཚེ་ད་ཐེངས་འདི་ལ་ཨ་ཅང་ཅང་།།

གདོད་ནས་འདྲིས་བའི་ཉམས་ཤིག་མི་འདུག་གམ།།

བདག་གི་བརྩེ་བའི་རྒྱ་ཁྱོན་འདི་ཙམ་བསྐྱངས་ནས།།

གཞོན་པའི་སེམས་པ་སླར་ཡང་རྒས་སུ་མ་བཅུག།

གསར་འགྲོགས་སེམས་ཀྱི་ཚོར་བ་ལམ་ལམ་དེ་ཡང་།།

ཤི་བའི་རྗེས་སུ་མི་དེའི་སྙིང་ལ་འཁོར་འོང་།།

7 comments:

  1. རི་ཕྱོར་རྒྱ་མཚོ་ནས།September 6, 2011 at 12:10 AM

    གང་ན་ཡོད།

    ReplyDelete
  2. ཕེབས་པར་དགའ་བསུ་བྱེད། རྩོམ་ཡིག་སྣ་མང་ལ་རོལ་མྱོང་བྱ་ཐུབ་པར་སྨོན།

    ReplyDelete
  3. ཨོ་རེད། རྗེས་མར་ང་ལ་འབྲེལ་བ་བྱོས་དང་ངས་ཁྱོད་ལ་ཟིན་བྲིས་འདི་ཅི་ལྟར་བཟོ་དགོས་པ་གསལ་བོར་བཤད་ཆོག།

    ReplyDelete
  4. ཁ་བ་འབབ་ཐེངས་ཤིག་ལ་སྙན་ངག་རོལ་མྱོང་བྱས་ཡོད། བསང་གསེར་ཆུང་ནས།

    ReplyDelete
  5. ང་དུར་ཁྲོདSeptember 6, 2011 at 2:01 AM

    ཕེབས་པར་སྤྲོ་བོ་བྱུང་། ལྷོད་མཇལ་མ་བྱུང་ཡང་མཆན་བུ་ཐེབས་པ་མཐོང་བས་བློ་སེམས་བདེ། རྗེས་མར་གོ་སྐབས་ནམ་ཡོད་ལ་མཇལ་ཆོག

    ReplyDelete

འདིར་བསམ་འཆར་སྤེལ་བར་དགའ་བསུ་ཞུ། རང་ཉིད་ཀྱི་མིང་ངམ་མིང་ཚབ་སྤྱོད་འདོད་ན་Comment as:ཞེས་པའི་འགྲམ་གྱི་གདམ་ངའི་ཐིག་བྱང་ལས་Name/URLའདེམས་དགོས། དེ་མིན་མིང་མེད་པར་སྤེལ་འདོད་ན་ཐད་ཀར་སྤེལ་ཆོག་ལ་ཐིག་བྱང་ལས་Anonymousཞེས་པ་འདེམས་ཀྱང་ཆོག དཔྱད་གཏམ་སྤེལ་ཚར་རྗེས་མདུན་ཤོག་སྟེང་དུ་ཕྱིར་འགྲོ་འདོད་ན་ཀླད་ཀྱི་པོད་ཁུག་གི་མིང་བྱང་སྟེང་དུ་མནན་ན་ཆོག་ལ་འདབས་ཀྱི་Homeཞེས་པའི་སྟེང་དུ་མནན་པས་ཀྱང་ཆོག འདིར་གང་ཟག་སྒེར་ལ་གཞི་མེད་སྐྱོན་འཛུགས་དང་ཕན་ཚུན་འཚང་འབྱིན་རིགས་ངེས་པར་དུ་སྤོངས།

ཟིན་བྲིས་ནང་ལོགས་ཀྱི་ཆེད་སྒྲིག།

ཟིན་ཐོ་སྤེལ་གྲངས་ཐ་མར་ལྟ་བ།

luntsom

བྱ་བརྒྱ་འཕུར་ཤུལ་གྱི་མགྲོན་པོ།


རྫོགས་མེད་ལུས་ཀྱི་མྱངས་བྱར་ཕ་མཐའ་མེད་པས།།
བྱེ་མའི་འཇིག་རྟེན་འདི་ནས་སྤོབས་པ་རྙེད་བྱུང་།།
ཚེ་ཡི་རི་མོ་རྙིང་ནས་ཡལ་རག་བར་དུ།།
བདག་གི་ཚོར་སྣང་གླུ་ཡི་སྐད་ལ་འཐིམས་སོང་།།

བཟི་ཁས་རྨི་ལམ་མྱངས་པའི་མི་ཆེན་དེ་ཚོ།།
ནམ་མཁའི་བྱ་ཆེན་དག་གི་སྐྱེ་བ་ཡིན་འདུག།
སྲོད་ཀྱི་གྲིབ་ནག་འགུལ་བའི་གཟུགས་ལ་བལྟས་ནས།།
མཁའ་ཡི་སྤྲིན་པ་གཤགས་ནས་འཕུར་ཚུལ་སྔ་སོང་།།

བཙན་གྱི་འཛུལ་ཞལ་སྟོན་པའི་རི་ཁའི་མི་ལ།།
གསར་འབྱོར་གླུ་བ་ཞིག་གི་མགྲིན་པ་བཏེགས་ཡོད།།
རྒས་མེད་དུངས་སྣང་ཞིག་གི་དྲན་ཤིང་བར་ནས།།
སླར་ཡང་བརྩེ་བའི་གནའ་གཏམ་འཆད་ལ་ཉན་ཡོད།།

སྲོག་གི་དབྱངས་རྟ་ཡོད་པའི་ཕོ་བྲང་ཞུགས་ཚེ།།
སྐྲ་ཡི་སྐུད་པ་ཆད་པའི་བར་ཆད་བྱུང་ནས།།
ཉི་མའི་འཁར་བར་ཁེན་པའི་རྨི་ལམ་རེ་རེ།།
འདི་ལྟར་མཇལ་འཛོམས་ཞིང་གི་མིག་ཆུ་ཡིན་འགྲོ།།

སྐྲ་ལོ་མི་ཁས་ཁུར་བའི་གླུ་བ་རེ་རེ།།
ལམ་ཁའི་གྲོང་ཚོ་ཞིག་གི་མགྲོན་པོ་ཡིན་པས།།
ཕུགས་བསམ་ཀ་ཁའི་རྣམ་ཤེས་ཇི་སྲིད་གསོན་ན།།
ཚིག་གི་གྲོང་ཁྱེར་བསྐྲུན་ལ་ང་རང་ཤི་མེད།།
འཁྱམ་པོ་གངས་རིའི་འོད་ཟེར།