Saturday, September 3, 2011

ལ་རྒྱག་དགོས་པའི་མི།

ལ་བརྒྱབ་དགོས་པའི་མི།།

བྱང་བོད་ཀྱི་ཡུལ་ལ་ཁ་ཐག་རིང་།།

རྒྱང་རི་བོ་ཞིག་གི་ཕར་ནང་རེད།།

མི་སྐྱོ་བོ་ཞིག་གི་ཕ་ཡུལ་རེད།།

རླུང་བསེར་བུའི་མྱི་ཁ་འབོད་ས་རེད།།

བྲག་དམར་པོ་དགྲ་ལྷ་རང་འཁོར་རེད།།

རྫ་མཐོན་པོ་བང་རིམ་དགུ་བརྩེགས་རེད།།

སྤང་ལེབ་མོ་གོས་ཆེན་རི་མོ་བཀྲ།།

ངས་ད་ནངས་བརྗེད་ཀྱང་དོ་ཞག་དྲན།།

བྱང་རི་བོ་འགུལ་ན་འབྲོང་གཡག་ཞོག།

ནུབ་ཉི་མ་དམར་ན་དགོ་བ་འགྲོགས།།

ལས་མ་དག་འཇིག་རྟེན་འཁོར་བ་ན།།

འདི་ད་ནངས་རྒྱུ་ཡང་དོ་ཞག་མེད།།

མཁར་དམར་པོ་སྲིད་པའི་ཆགས་རི་རེད།།

འགྲམ་ལྕགས་རི་བློན་པོའི་འགྱིང་རི་རེད།།

འདི་མི་བརྟན་བསྒྱེལ་མཁན་གཞན་མྱི་རེད།།

དེ་བཟང་གི་ཟེར་མཁན་བོད་པ་རེད།།

ཆུ་གཙང་བོ་གཡུ་འབྲུག་དགུ་འཁྱིལ་ན།།

སྲོག་མེད་པའི་བེམ་པོ་སྟོང་ཕྲག་ཅིག།

འདི་གང་ནས་ཡོང་བ་ཁྱོས་ཤེས་སམ།།

དོན་ཅི་ཞིག་ལྷག་པ་ཁྱོས་རྟོགས་སམ།།

རི་མཐོན་པོ་ཡོད་ན་རྩེ་མོ་བཅད།།

ས་བཟང་པོ་ཡོད་ན་གཏིང་ནས་བསློགས།།

ཆུ་ས་ཁར་ཡོད་པ་ས་འོག་དྲངས།།

ལས་མི་དག་ལས་མཁན་འདི་ཚོ་སུ།།

གཏམ་པ་བས་མ་བཏང་ཨ་མས་བཏང་།།

ཁྱི་བདག་པོས་མ་བཀག་མགྲོན་པོས་བཀག།

ལས་མ་དག་ལས་ངན་ཁྱིམ་གང་ལ།།

སྡུག་མནར་གཅོད་གཏོང་མཁན་འདི་ཀོ་སུ།།

འདིས་གཡང་ཁྱིམ་ཕུགས་རྟེན་རྫོགས་རྒྱུས་ཟེར།།

འདིས་ལྷས་ཀྱི་གཡང་ཟོག་བཤའ་རྒྱུས་ཟེར།།

སྔོན་སྐྱེས་པའི་ལས་ཤིག་རེད་ཨེ་བསམས།།

ད་སྐྱེས་པའི་སྐྱོན་ཞིག་རེད་ཨེ་བསམས།།

ཡང་མིན་ན་དམྱལ་བ་ན་རག་བྱེད།།

ལས་ཅི་ཞིག་བྱུང་ན་བྱུང་གི་འཇུག།

དེ་མིན་འཁོར་བར་ངོ་ལོག་བྱེད།།

མྱི་རང་གི་བསམ་དོན་འགྲུབ་ནི་བྱེད།།

དོན་ཅི་དགའ་དེ་རིང་གྲོས་ལ་འཇོག།

སེམས་ཕྱི་ནང་མེད་ལ་མདུན་ན་སྟོན།།

གྲོས་ཐག་གཅོད་རྣམ་དཔྱོད་རྩལ་ལ་བྱེད།།

ཕུགས་རང་ཉིད་ཕམ་ཡང་གནོང་འགྱོད་ཅི།།

མྱི་གཞན་པ་སྡུག་ན་སྡུག་ནི་ཡིན།།

གྱོང་རང་གིས་ཁུར་ན་ཁུར་ནི་ཡིན།།

སེམས་ཡ་ཆུང་སྡུག་དེ་གཡས་ལ་འཇོག།

ནང་སྡེ་བའི་གནོན་ཤུགས་གཡོན་ལ་འཇོག།

ད་ཅི་ཞིག་བྱུང་ན་བྱུང་གི་ཆུགས།།

བརྒྱ་སྡུག་ལ་ཐུག་ཀྱང་སྡིག་པ་མིན།།

ལས་ཀླུང་རྟ་དར་ན་དགེ་བ་མིན།།

སེམས་འདི་ལ་དེ་འདྲའི་ཉམས་ཤིག་འཆར།།

སྣང་འཁྲལ་འཁྲུལ་འདི་ཡིས་བསླུས་བསླུས་ནས།།

ངས་དག་པའི་ཞིང་ཞིག་རིག་ནས་འདུག།

མཐོ་ཆེ་ཆེ་འདི་ཡིས་བསྡམས་བསྡམས་ནས།།

ངས་སྐྱིད་ཀྱི་ཡུལ་ཞིག་མཐོང་ནས་ཡོད།།

དེང་དུས་ཀྱི་བཅད་རྩོམ་གསར་མར་འབོད་པའི་སྙན་ངག་འབྲི་བ་ལ་རང་དབང་གི་རྩལ་ཐོབ་པའི་ཉི་མ་ཁ་སྔོན་ནས་བཟུངས། ཁོ་བོས་སྙན་ངག་གི་ཁྱིམ་གཞི་བརྟན་པོ་ཞིག་ཚུགས་སོང་སྙམ་པའི་ཡིད་ཆེས་དབྱངས་སུ་འཐེན་ཡོད་ལ། གྲོགས་པོ་ཁྱོད་ཀྱང་དགའ་སྐྱོའི་རི་མོ་འཐག་པའི་མི་ཚེའི་ངོ་གདོང་ནས་མ་རྒས་པར་སྙན་ངག་གི་ཞིང་ཁམས་སུ་དགའ་བདེའི་དཔལ་གྱིས་མྱོས་པར་ཤོག་ཅིག

No comments:

Post a Comment

འདིར་བསམ་འཆར་སྤེལ་བར་དགའ་བསུ་ཞུ། རང་ཉིད་ཀྱི་མིང་ངམ་མིང་ཚབ་སྤྱོད་འདོད་ན་Comment as:ཞེས་པའི་འགྲམ་གྱི་གདམ་ངའི་ཐིག་བྱང་ལས་Name/URLའདེམས་དགོས། དེ་མིན་མིང་མེད་པར་སྤེལ་འདོད་ན་ཐད་ཀར་སྤེལ་ཆོག་ལ་ཐིག་བྱང་ལས་Anonymousཞེས་པ་འདེམས་ཀྱང་ཆོག དཔྱད་གཏམ་སྤེལ་ཚར་རྗེས་མདུན་ཤོག་སྟེང་དུ་ཕྱིར་འགྲོ་འདོད་ན་ཀླད་ཀྱི་པོད་ཁུག་གི་མིང་བྱང་སྟེང་དུ་མནན་ན་ཆོག་ལ་འདབས་ཀྱི་Homeཞེས་པའི་སྟེང་དུ་མནན་པས་ཀྱང་ཆོག འདིར་གང་ཟག་སྒེར་ལ་གཞི་མེད་སྐྱོན་འཛུགས་དང་ཕན་ཚུན་འཚང་འབྱིན་རིགས་ངེས་པར་དུ་སྤོངས།

ཟིན་བྲིས་ནང་ལོགས་ཀྱི་ཆེད་སྒྲིག།

ཟིན་ཐོ་སྤེལ་གྲངས་ཐ་མར་ལྟ་བ།

luntsom

བྱ་བརྒྱ་འཕུར་ཤུལ་གྱི་མགྲོན་པོ།


རྫོགས་མེད་ལུས་ཀྱི་མྱངས་བྱར་ཕ་མཐའ་མེད་པས།།
བྱེ་མའི་འཇིག་རྟེན་འདི་ནས་སྤོབས་པ་རྙེད་བྱུང་།།
ཚེ་ཡི་རི་མོ་རྙིང་ནས་ཡལ་རག་བར་དུ།།
བདག་གི་ཚོར་སྣང་གླུ་ཡི་སྐད་ལ་འཐིམས་སོང་།།

བཟི་ཁས་རྨི་ལམ་མྱངས་པའི་མི་ཆེན་དེ་ཚོ།།
ནམ་མཁའི་བྱ་ཆེན་དག་གི་སྐྱེ་བ་ཡིན་འདུག།
སྲོད་ཀྱི་གྲིབ་ནག་འགུལ་བའི་གཟུགས་ལ་བལྟས་ནས།།
མཁའ་ཡི་སྤྲིན་པ་གཤགས་ནས་འཕུར་ཚུལ་སྔ་སོང་།།

བཙན་གྱི་འཛུལ་ཞལ་སྟོན་པའི་རི་ཁའི་མི་ལ།།
གསར་འབྱོར་གླུ་བ་ཞིག་གི་མགྲིན་པ་བཏེགས་ཡོད།།
རྒས་མེད་དུངས་སྣང་ཞིག་གི་དྲན་ཤིང་བར་ནས།།
སླར་ཡང་བརྩེ་བའི་གནའ་གཏམ་འཆད་ལ་ཉན་ཡོད།།

སྲོག་གི་དབྱངས་རྟ་ཡོད་པའི་ཕོ་བྲང་ཞུགས་ཚེ།།
སྐྲ་ཡི་སྐུད་པ་ཆད་པའི་བར་ཆད་བྱུང་ནས།།
ཉི་མའི་འཁར་བར་ཁེན་པའི་རྨི་ལམ་རེ་རེ།།
འདི་ལྟར་མཇལ་འཛོམས་ཞིང་གི་མིག་ཆུ་ཡིན་འགྲོ།།

སྐྲ་ལོ་མི་ཁས་ཁུར་བའི་གླུ་བ་རེ་རེ།།
ལམ་ཁའི་གྲོང་ཚོ་ཞིག་གི་མགྲོན་པོ་ཡིན་པས།།
ཕུགས་བསམ་ཀ་ཁའི་རྣམ་ཤེས་ཇི་སྲིད་གསོན་ན།།
ཚིག་གི་གྲོང་ཁྱེར་བསྐྲུན་ལ་ང་རང་ཤི་མེད།།
འཁྱམ་པོ་གངས་རིའི་འོད་ཟེར།