སེམས་ཀྱི་ཁེན་ས།

མུ་མེད་འཁོར་བའི་གནས་ཚང་སྐྱ་བོ།།
ལན་ཅིག་མགྲོན་ལ་འབྱོར་བའི་མི་རྐྱང༌།།
རྟེན་འབྱུང་ཟབ་མོས་གཅིག་ཏུ་བསྡུས་པར།།
སྐྱོ་གདུང་མཆི་མས་ཁ་བྱང་བྲིས་ཐལ།།

ཨ་ཐང་ཆད་པའི་མི་ཚེའི་བཤུལ་ལམ།།
རིང་བར་བསམ་པ་འཁྲུལ་བའི་གཞི་རྩ།།
སྐད་ཅིག་ཙམ་གྱིས་ཕྱོགས་སུ་འཁྱར་དུས།།
མནོག་ཆུང་སེམས་ཀྱི་ཁེན་ས་དྲན་བྱུང༌།།

ཆུང་ཆུང་ལུས་སེམས་བརྩེ་བས་བསྐྱངས་ཏེ།།
དགའ་བའི་གཏམ་གྱིས་ངོ་སོ་བསྟོད་པའི།།
བཅོ་ལྔའི་སྔོན་གྱི་ཕ་མའི་དུངས་ཀ།
དེ་རིང་དྲན་ན་ལྷག་ཏུ་སྐྱོ་བ།།

བྲལ་བའི་རྗེས་ཀྱི་དྲན་པའི་རི་མོ།།
སྐྲ་ལོ་ཁ་བས་ཟོས་པ་འདིས་མཚོན།།
མཚོན་དུ་མེད་པ་སེམས་ཀྱི་ན་ཟུག།
བླུན་པོ་དགའ་བའི་གཏམ་དུ་མི་སྐྱུར།།

ཐོབ་དཀའི་མི་ཚེའི་ལག་ཡོང་གཅིག་བུ།།
བརྗེད་དུ་མེད་པའི་དང་བོའི་འཚོ་བ།།
ལུས་སེམས་སྒྱུ་མའི་སྣང་བ་ཞིག་ཚེ།།
མི་ཡུལ་ཁམས་འདིར་ཤུལ་དུ་བསྐྱུར་ཆོག།

འཛོམས་པའི་མཐའ་དེ་འབྲལ་བས་བསུབ་ཏེ།།
བར་ཐག་མིག་ཆུས་མཚོ་ཡིས་བཅད་ཀྱང༌།།
རང་ཡུལ་འབའ་ཆུ་སྔོན་མོའི་ཕྱོགས་ལ།།
གཉེན་ཉེའི་དུངས་ཀ་ཆོད་ཐབས་མི་འདུག།

ཡུན་རིང་མ་སྟོར་སེམས་ཀྱི་ཁེན་ས།།
ད་དུང་མི་འབོར་མི་ཚེའི་སྙིང་བོ།།
ནམ་ཞིག་འབའ་ཡུལ་ལུ་གུའི་རྩེད་རར།།
འཁོར་མེད་དྲིན་ལན་ཅན་དེར་འཕྲད་ན།།

མ་བཅོས་སེམས་ཀྱི་གཏམ་གྱི་ཕྲེང་བ།།
དྲན་གདུང་མཆི་མའི་སྐུད་པར་བརྒྱུས་ཏེ།།
ཡུན་རིང་བོར་བའི་བུ་ལ་འཕྲད་པའི།།
བྱམས་སེམས་ཅན་དེའི་སྙན་དུ་འབུལ་ལོ།།
འདོན་སྤེལ།: ༢༠༠༨/༠༩/༡༢