ཐག་རིང་གི་ཕ་མ་དྲན་ཚུལ།

བྱམས་ལྡན་ཕ་མ་སེམས་ཀྱི་ནང་དུ་འཁོར་ཞིང་།།

སྐྱོ་གདུང་མཆི་མས་སེམས་པ་བཙོན་དུ་བཅུག་འདུག

ཕ་གིའི་མཚོའུ་འགྲམ་གྱི་བསིལ་ཁང་དེ་རུ།།

ཕ་མ་དྲན་པའི་སེམས་པ་ཡང་ཡང་ལུས་སོང་།།

འཕྲིན་དང་ཁ་པར་བར་གྱི་སྐད་ཆ་དག་གིས།།

ང་ཡི་དྲན་གདུང་སེལ་བའི་སྟ་གོན་བྱེད་བཞིན།།

ཡུན་རིང་མ་འཕྲད་ཕ་མའི་བསླབ་བྱ་ཀློག་དུས།།

ང་ཡི་སེམས་པ་མཆི་མའི་ས་གཞི་ཡིན་སོང་།།

མཐོངས་སུ་ལྡིང་སྐོར་རྒྱག་པའི་བྱ་ཆེན་དག་གིས།།

སྤྲིན་གྱི་བར་གསེང་ཕྲེད་དང་ཕྲེད་དུ་བཅད་དེ།།

སྣང་སྟོང་ཉམས་ཀྱི་གཤོག་སྒྲོ་བྲག་ལ་འཐོག་དུས།།

ང་ཡི་ངང་ཚུལ་འདི་དང་མཚུངས་པ་ཚོར་བྱུང་།།

རྒྱང་རིང་སྐད་ཆ་རྣ་བའི་དཔྱིད་དུ་སྨིན་ཞིང་།།

སྐྱོ་བ་ཤེད་ཀྱིས་སྟོང་བའི་དུས་ཚིགས་བསླེབས་པས།།

ཆུང་དུས་ལྟེ་ཁྲག་འཕོ་སའི་ཕ་ས་དྲན་བྱུང་།།

ཕ་སར་ང་ལ་སྒུག་པའི་ཕ་མ་དྲན་བྱུང་།།

སྐྱོ་བའི་སེམས་ལ་དྲན་པའི་ཆར་བ་བཏང་བྱུང་།།

སེམས་ཀྱི་ལྗོན་ཤིང་དྲང་མོ་ཆར་བས་བརླན་སོང་།།

རེ་འབྲས་ཤིང་ཏོག་འཐུ་བར་ད་དུང་འགོར་བས།།

རྒྱང་རིང་ཕ་མ་གཉིས་ལ་མཇལ་ཡུན་འཕྱིས་སོང་།།

དེ་ནས་ཉི་མ་ཚུར་འགྲོ་སེམས་ཀྱིས་སྐྱེལ་ཆོག།

འདི་ནས་ཟླ་བ་ཕར་འགྲོ་བརྩེ་བས་བསྒུལ་ཆོག

ཆུང་དུས་ཕ་མའི་གམ་གྱི་འཚོ་བ་མཐའ་དག།

འདི་ནས་རྨི་ལམ་གཅིག་གི་ཡུན་ལ་དྲན་ཆོག

དྲན་པའི་གཞུ་མོ་ཕ་དང་མ་ལ་ཕྱོགས་དུས།།

འདབས་ཀྱི་རི་ཆུ་ཀུན་གྱིས་སྐྱོའོ་ཟེར་བྱུང་།།

གདུང་ཚོར་ལྕི་མོས་མིག་ཆུ་རྡོག་གཅིག་ལྷུང་དུས།།

ས་དང་གཙང་པོ་ཐམས་ཅད་ཡོམ་ཡོམ་འདར་སོང་།

འཚོ་བའི་ངོ་གདོང་གང་སར་གཅིག་བུར་འགྲིམས་པས།།

ལམ་གྱི་དཀའ་བ་ཐམས་ཅད་འཕྲེད་ཀྱིས་བཅད་མོད།།

ཡབ་ཡུམ་ཐུགས་དང་འགལ་གྱིས་དོག་པ་ཞིག་གིས།།

བདག་གི་རྨི་ལམ་དྭངས་མོ་རབ་རིབ་ཆགས་སོང་།།

འཇབ་ཀྱིན་མི་ལོ་ཉེར་བདུན་མདུན་ལ་བསླེབས་ཤིང་།།

ཚ་ཚ་འུར་འུར་འཚོ་བའི་མི་ཚེ་བརྒལ་དུས།།

ཡབ་ཡུམ་གཉིས་པོ་སེམས་པ་འདི་ལ་འཐོག་བྱུང་།།

སེམས་ཀྱི་སྟེང་ལ་འགྱོད་པའི་རྨ་ཁ་ཤོར་སོང་།།

ཕ་མ་གཉིས་ཀྱིས་སྡུག་དང་དཀའ་བ་སྤྱད་དེ།།

བུ་ཡི་འདུན་མ་བཟང་བོའི་སྨོན་ལམ་འཁྱོངས་སྐད།།

འཇིག་རྟེན་མི་ཡི་འགྲོ་ལུགས་སྣ་ཚོགས་ཁྲོད་ནས།།

ཕ་མའི་ཐུགས་དང་འཚམས་པ་ཞུ་སྐལ་ཡོད་དམ།།

འགྲོ་ལམ་ཁད་ཀྱིས་བརྒལ་ནས་རི་ཁར་བསླེབས་སོང་།།

སྤྲིན་དང་སྨུག་པ་བོད་ཀྱི་ཡུལ་ལ་འཐིབས་འདུག།

ཕ་མའི་བྱམས་ཀྱིས་སེམས་ཀྱི་མཆི་མ་བསྐམས་ཤིང་།།

གཅེས་པའི་ཉམས་ཀྱིས་བུ་ཡི་ཞེ་སྡུག་བསལ་བྱུང་།

སྤྲིན་པ་དཀར་པོ་ཕ་མས་མངགས་པ་འདྲ་བྱུང་།།

འདི་སྣང་གྱེས་བྲལ་རིང་མོའི་རི་ཆེན་བརྒལ་དུས།།

རི་བོའི་ཟོམ་དུ་རྒྱ་མཚོའི་ཟོལ་གྱིས་འཕྱུར་སོང་།།

ཐང་གི་གཤོང་དུ་མཚེའུ་ཚུལ་གྱིས་ལྟེམས་སོང་།།

2011.2.1

ནག་པོའི་རྣལ་འབྱོར་བའི་གླུ།

ཁག་དང་པོ།

ཉི་མ་དེ་རིང་ང་རང་ཤིན་ཏུ་སྐྱོ།།

ཆར་ཤུལ་རླུང་བུ་ལྡིང་བས་ནང་ཡང་འཁྱགས།།

མི་སེམས་བརྩེ་བས་ལྷོད་པའི་དུས་ཤིག་ནས།།

ང་ལ་གཞན་གྱི་རྣམ་འགྱུར་གྲང་ཤུར་ཤུར།།

ཕར་རྒྱབ་རི་དེའི་རྒྱབ་ཏུ་འགྲོ་སྙིང་ཞིག།

ལམ་དེ་ཀྱག་ཀྱོག་ཆེ་བའི་ཉོབ་སྣང་ཞིག།

མ་ཚང་མེད་པ་དཀའ་བ་ཀུན་ཚང་བའི།།

ང་ཡི་འཚོ་བ་འདི་ནི་སུ་ཡིས་རྟོགས།།

ཆར་ཤུལ་འཇའ་ཚོན་ཤར་བ་ངས་མ་མཐོང་།།

ཁ་ཤུལ་ཉི་མ་དྲོ་བ་ངས་མ་ཚོར།།

མཐའ་མེད་སྡུག་གི་ནམ་མཁའ་འདི་མཐོང་ནས།།

ངོས་ཀྱིས་མི་དེ་ཅི་འདྲའི་རིང་ཨང་སྙམ།།

ཀྱེ་མ་འཇིག་རྟེན་སྐྱོ་བ་མུ་མཐའ་མེད།།

བོད་ཀྱི་བུ་ཆུང་སྨན་ཤར་གཅིག་གིས་བསླུས།།

ཚེ་ཡི་སྐུད་པ་དེ་ཡིས་གཙེས་གཙེས་ནས།།

མཐའ་ཡི་སྣེ་དེ་གཞན་གྱིས་མཐོང་བར་ཉེ།།

ཁོག་རྒྱ་ཡབ་ཆེན་ནང་བཞིན་ཡོད་ན་དགའ།།

བརྩེ་བ་ཡུམ་ཆེན་ནང་བཞིན་ཡིན་ན་སྐྱིད།།

མི་སེམས་འཁྱགས་པ་དེ་ཡང་མེད་ན་དགའ།།

ཐམས་ཅད་མཉམ་དུ་ཤུགས་ཀྱིས་བགད་ན་མཛེས།།

སེམས་པ་ཨ་ལོང་འདྲིལ་བའི་ཚུན་ཆུད་དུ།།

མི་དེ་དེ་འདྲའི་རྒྱུས་མེད་ཨ་ཅང་ཅང་།།

ལུས་དང་ལག་པ་འཁྱུད་པའི་ཕྱིན་ཆད་ནས།།

ད་དུང་རྒྱུས་མེད་འདི་ཡང་ཏག་ཏག་མིན།།

ལ་རྒྱབ་ལ་ཡིས་ཆོད་པར་དཔེ་བླངས་ནས།།

ངོས་ཀྱིས་ཁྱོད་ལས་འདྲ་བའི་གཟུགས་ཤིག་མཐོང་།།

ཁྱེད་ཀྱིས་མི་ཤེས་གསུངས་ན་འགྲེལ་ཞིག་རྒྱག།

གཞན་ལ་མ་སྟོན་གསུངས་ན་གཏེར་ལ་རྒྱག།

མེ་ལོང་འདི་ཀོ་སྒྱུ་མ་ཡིན་ནམ་ཅི།།

ཁྱོད་ནི་འདི་ལས་ཏག་ཏག་མཐོང་བ་ཅི།།

རང་སེམས་འཁྲུལ་སྙམ་ཤ་གཅུས་བརྒྱབ་ན་ཡང་།།

མ་འཁྲུལ་མ་སྨྱོས་ང་ནི་གསལ་ཐང་ཐང་།།

ཁྱོད་ལ་རང་གཤིས་དྲངས་མོའི་ཚད་ཅིག་འཇོག།

ང་ཡི་སྐྱོ་བ་འདི་ཀུན་བསལ་ནས་ཤོག།

ཁྱོད་ལ་མྱི་ཁ་མེད་པའི་ཁས་ལེན་བྱེད།།

ང་ཡི་བོར་བའི་མི་ཚེ་བཙལ་ནས་ཤོག།

ངོས་ནས་མི་ཚེ་སྐྱོ་ཞིང་འགྲོའོ་སྙམ།།

གཞན་གྱིས་མི་ཚེ་སྐྱིད་ཅིང་འདུག་གོ་སྨྲ།

སྣང་བའི་ལྭ་བ་ཕུད་དེ་སྒོར་བུད་ན།།

ཕྱི་ཡི་ཡུལ་ལྗོངས་ཡངས་ཤིང་ཆེ་བ་འདྲ།།

ཨ་ཙི་མི་ཚེ་འདི་ནི་རིང་བ་འདྲ།།

ཁོ་བོའི་སྐྱོ་གླུ་འདི་ཡང་སྙན་པ་འདྲ།།

ས་ལ་རྐང་རྗེས་འཇོག་པའི་མགོ་ནག་ཅིག།

གླུ་ཡི་འགྱུར་ཁུགས་འཇོག་པའི་ལས་ལ་བྲེལ།།

2010.3.15 ལ་རང་ཤག་ཏུ།

ཆད་སོང་བའི་རྣམ་རྟོག

བདེ་བའི་རྨི་ལམ་ཞིམ་པའི་ཟས་སུ་རློམ་སྟེ།།

བརྩེ་བའི་འཛུམ་ཆུང་མར་ལོའི་གཟུགས་སུ་ཕུལ་བས།།

རྒྱང་ནས་རིང་དུ་ཆད་པའི་རྣམ་རྟོག་ཡོལ་བ།།

གྱེས་ཁའི་ཕྱི་མིག་ཅིག་གི་ཕྲག་ལ་ལྷུང་ཐལ།།

ལམ་དེ་དཀར་པོ་ཡིན་ན་ཕྲེད་དུ་བཅད་ཆོག།

ང་ནི་རྐང་ལམ་འགྲིམས་པའི་མཇལ་བ་དེ་ཡིན།།

ཕྱག་ཟུང་དར་དཀར་རྐྱོང་བའི་ལྷ་མོ་ཁྱོད་ལ།།

འཇིག་རྟེན་འདི་ནས་འཛོམས་པའི་ལས་འཕྲོ་ཡོད་འདུག།

ཁྱོད་ཀྱིས་རྗེན་རྗེན་དམར་དམར་གསུངས་པ་དེ་དག།

ཁྱོད་ཀྱིས་ཡང་ནས་ཡང་དུ་བསྐྱོར་བ་དེ་དག།

སྐྲ་དང་པགས་པ་བརྒྱུད་ནས་རུས་པར་ཐིམ་པས།།

ངོས་ནས་ཁྱོད་ཀྱི་ཡོད་ཚད་གསལ་ལེར་མཐོང་སོང་།།

ཞལ་ངོ་པིར་གྱིས་མ་བྲིས་ནམ་མཁའི་ལྷ་མོར།།

སྤྱན་མིག་འཐབས་པའི་བར་ནས་ཡུན་ཙམ་ལུས་པས།།

ང་ཡི་སྣང་བ་སྟོང་བའི་དབྱིངས་ལ་འདྲིས་བྱུང་།།

ཁྱོད་ཀྱི་དགའ་བ་མི་ཤིགས་ཁམས་སུ་བརྟན་སོང་།།

ཨེ་མ་དེང་འདིར་བརྗིད་པའི་ཆེན་པོ་དག་གིས།།

སྐྱིད་པའི་གནས་མལ་འདི་འདྲ་མ་རྙེད་གོང་ལ།།

ལན་ཆགས་ལུས་ནས་དག་པའི་ཨ་སྐྱོ་བ་ཡིས།།

མ་བསམ་བརྗོད་ལས་འདས་པའི་དགའ་བ་འཁྱོངས་སོ།།

ལས་ཀྱི་ཐག་པ་རེ་རེ་འདི་ལྟར་བཅད་ཅིང་།།

རྣམ་རྟོག་གཉེར་མ་རེ་རེ་སེམས་ཀྱིས་བཤིགས་ན།།

ང་ནི་དར་ལ་བབ་པའི་ན་ཆུང་ཡིན་སྐད།།

ང་ནི་བརྩེ་བ་ལྡན་པའི་མྱི་ཞིག་ཆགས་སྐད།།

ཀྱེ་མ་འཁོར་བའི་གསང་བ་ཡོངས་སུ་བརྟོལ་བས།།

ཐམས་ཅད་སྐད་དུ་བརྗོད་ཀྱང་སྙིང་བོ་ཅི་ཡོད།།

བྱིན་པའི་མི་ཟིན་སེམས་ཀྱི་བདེ་བ་མཐའ་མེད།།

ཡོངས་སུ་འཛིན་པའི་ལྷ་མོ་འདི་ཀོ་ཉིད་དོ།།

བོད་ལ་བདག་པའི་ཡུལ།

ཆུ་བོ་དེ་ནི་ཀྱ་ཀྱུའི་ངང་ནས་འདི་རུ་བཞུར།།

མེ་ཏོག་དག་ཀྱང་འདབ་མ་གཡོ་བཞིན་འདི་ནས་སྐྱེས།།

སྔོ་ལྗང་བཀྲ་བའི་ཞིང་ཁམས་འདི་ནི་ང་ཚོའི་སྟེ།།

སེམས་ཀྱི་རྟོག་འགྱུ་ཡུན་གྱིས་བཞུར་བའི་མོན་ཡུལ་ལོ།།

ཤིང་ནགས་དག་གིས་བོད་ཀྱི་མི་ལ་གྲིབ་བསིལ་སྦྱིན།།

ཕུ་ཆབ་འདི་ཚོས་བོད་ཀྱི་མགྲོན་པོར་སྐོམ་གདུང་སེལ།།

ཕ་ཡུལ་བོར་བའི་མི་ཚོགས་དག་ལ་སྣེ་ལེན་གྱིས།།

བཙན་པའི་དུས་ཀྱི་དམག་བྲོ་དག་ཀྱང་འཁྲབ་བཞིན་འདུག།།

སྐད་ཀྱི་རོལ་མོ་དལ་གྱིས་དཀྲོལ་བའི་མོན་པ་ཚོས།

ང་ཅག་བོད་ལ་བརྩེ་བའི་འཛུམ་གྱིས་བསུ་ལེན་བྱེད།།

ཧི་མ་ལ་ཡའི་སྤྲིན་གྱི་རྒྱ་མཚོ་འཕྱུར་བའི་སར།།

བསམ་གཞིགས་སྟོང་གི་རི་མོ་འགུལ་བའི་དབྱངས་རྟ་ཆད།།

ལས་བརྩོན་ཞིང་འབྲོག་ལས་ལ་བྲེལ་བའི་གཤིས་ཀ་དང་།།

ཤ་རུས་གཅིག་པའི་གཉེན་ལ་དུངས་པའི་ངང་ཚུལ་འདིས།།

སྔོན་ཆད་བཙན་པོའི་དཔུང་གི་སྟོབས་ཤུགས་བསྒྱུར་བའི་མི།།

མི་ཡུལ་འདི་རུ་འདི་ལྟར་འཐོར་བར་སེམས་པ་སྨྲེང་།

བྱེའུ་ཆུང་ཅོ་ཀས་སྐད་བརྡ་བསྒྱུར་ཏེ་ཁམས་འདྲི་ཞུ།།

ན་ཆུང་གཞོན་མས་ཟུར་མིག་འཕེན་བཞིན་སྡོད་ཤོག་ཟེར།།

རང་ཡུལ་བོད་ལ་ཁོ་ཐག་འཚམས་འདྲི་ཆོད་ཡོང་གསུངས།།

རང་སེམས་འཁྱགས་པས་སླར་ཡང་དྲོད་ཅིག་འདི་ལྟར་རྙེད།།

རྒྱལ་བ་ཚངས་དབྱངས་ཆིབས་ཁ་བསྒྱུར་བའི་ལམ་དེ་ནས།།

བོད་ཀྱི་ཕྱོགས་ལ་རྒྱང་ལྟ་ཡང་ཡང་བྱས་པའི་ཚེ།།

སྤྲིན་དང་བསྡེབས་པའི་རི་བོ་ཞིག་གི་ཕང་བ་ནས།།

གསལ་ཞིང་སྙན་པའི་འབྲོག་གླུ་ལྷང་ལྷང་གྲགས་བཞིན་འདུག།།

20༡0.༨.༡2 ཉིན་མོན་རྟ་དབང་ནས་བྲིས།

མི་ཚེ་ལྷག་མ

ཨ་གསར་ཆེ་བའི་བུ་མོ།།
སེམས་ལ་འཐོག་པ་རང་རེད།།
དང་པོ་ཁྱོད་ལ་འགྲོགས་པ།།
གསར་འགྲོགས་ཆེ་བའི་ལན་སོང།།

སྐྱིད་ཆུ་སྔོན་མོའི་འགྲམ་དུ།།
སེམས་པ་སྐྱིད་ལ་བསྐུར་བ།།
ལས་དང་དབང་གི་འོག་ནས།།
སྣང་བ་གང་དྲན་འཆུག་སོང་།།

སྡུག་གི་མི་ཚེ་འདི་ལ།།
གསར་བུའི་ལས་འདི་སྡུག་པ།།
སྐྱིད་ན་ཚེ་སྔོན་ལས་རེད།།
སྡུག་ན་རང་གི་སྡུག་གྱོང་།།

ཁྱོད་དང་འགྲོགས་ཡུན་རྫོགས་སོང་།།
ལས་ཀྱི་ལྷག་མ་ཚར་སོང་།།
ད་ལྟའི་དུས་ཚིགས་འདི་ལ།།
སྐྱིད་སྡུག་ཞུ་ས་མི་འདུག།

ངའི་ཁང་པའི་མདུན་གྱི་སྔོང་ར།

ངའི་ཁང་པའི་མདུན་གྱི་སྡོང་ར་ན།

ནམ་རྒྱུན་ཅག་ཅག་གི་སྐད་སྒྲ་ཆེ་བའི་བྱེའུ་ཞིག་ཡོད།

བར་སྐབས་ཤིག་ནས།

ངའི་ཁང་པའི་མདུན་གྱི་སྡོང་མགོ་ན།

སྐྱིད་ཀྱི་དྲོད་ཁོལ་འཁྱིལ་སའི་བྱེའུ་ཚང་ཞིག་འདུག

ནམ་རྒྱུན་སྐྱ་མདའ་བཏང་བ་དང་བསྟུན།

ཅག་ཅག་ཅག ཅག་ཅག་ཅག

བྱེའུ་མ་དེས་འདི་ལྟར་སྐད་ཅོར་རྒྱག་པས

ངའི་རྨི་ལམ་གྱི་སྣང་བ་རུ་བཞེངས་པའི་ལྷ་མོ་དག་ཡལ་སོང་ལ།

ཧ་ཧ་ཧོ་ཧོར་བཏབ་པའི་དགོད་སྒྲ་དག་ཀྱང་གཟིམས་སོང་།

ང་ནམ་རྒྱུན་བྱེའུ་ཚང་དེར་ཅི་ཞིག་བཟོ་དགོས་སམ་བསམ་བཞིན་ཡོད།

ཏག་ཏག་སྐབས་ཤིག་གི་ཐོ་རེངས་ལ།

ངས་མདང་ནུབ་གྲ་སྒྲིག་བྱས་པའི་ཀོ་འཐེན་དེ་ཁྱེར་ཏེ།

སྡོར་རྩར་རྒྱུག་སྐབས།

ང་མ་སླེབས་པའི་སྐར་ཆ་ཁ་ཤས་ཀྱི་གོང་དེར་བྱེའུ་ཚང་ཐང་ལ་ཟགས་འདུག

བྱེའུ་མ་དེས་སྔར་ལས་ལྷག་པའི་སྐད་ཅོར་རྒྱག་བཞིན་འདུག

རེད། ངས་ཚོར་བྱུང་། ང་གོམས་འདུག

ནམ་རྒྱུན་བྱེའུ་མ་འདིས་སྐད་ནི་དེ་རིང་ནང་བཞིན་མི་འདུག

དངངས་འཚབ། འཇིགས་སྣང། གཏོལ་མེད།

ཨོ་དེ་རིང་གི་སྐད་ཅོར་འདི་ནི་ཞུ་བ་ཞིག་ཡིན་པ་ཚོར།

མིག་ཆུ་ཞིག་ཡིན་པ་ཡང་ཚོར།

སྒོ་རའི་ནང་གི་སྐས་སྐང་ལ་བརྟེན་ནས་ངས་ཚང་མལ་དེ་ཕྱིར་སྡོང་མགོ་རུ་བཞག

བྱེའུ་ཕྲུག་དག་གི་ལག་རྡང་འཐོར་སོང་མོད།

ཁ་ཤས་ད་དུང་གསོན་འདུག

མཚན་དེ་ནས་བཟུང་བྱེའུ་མ་དེས་ཡུན་རིང་ཞིག་ལ་སྐད་བརྒྱབ་མ་སོང་།

ངས་ནི་སྒེའུ་ཁུང་ལས་སྡོང་མགོར་ལྟ་ཐེངས་རེར།

བྱེའུ་ཞིག་གི་ཨ་མ་ལ་དགོངས་དག་ཞུ་དགོས་པའི་གནོང་འགྱོད་ཅིག་སྐྱེས།

ཞོགས་པ་དེ་ནས་བཟུང་། ང་སྔར་བཞིན་སྐྱ་མདའ་དང་ལྷན་དུ་སད་འགྲོ་ལ།

རྨི་ལམ་དུ་སྒོ་རའི་ནང་གི་སྡོང་མགོ་དེར་བྱེའུ་མང་པོ་འཛོམས་པའི་ངང་ཚུལ་བྱུང་།

དོན་ངོ་མར་བྱེའུ་སྐད་གདངས་ལ་སུན་པ་ནས་དུངས་པ་དང་།

རྒྱུས་མེད་ནས་རྒྱུས་ཡོད་དུ་གྱུར་བའི་གོ་རིམ་འདི་བརྒྱུད་དུས།

ངས་རང་གི་སྒོ་རའི་ནང་གི་བྱེའུ་ཚང་དེ།

ར་སྐོར་འདི་དང་བདག་པོ་དེའི་སྙིང་ཉེ་བ་ཞིག་དང་།

མཛེས་སྡུག་རྫོགས་མེད་ཅིག་ཡིན་པ་ཚོར།

ངའི་ཁང་པའི་མདུན་ན་སྡོང་ར་ཞིག་ཡོད།

སྡོའི་རའི་ནང་ན་བྱེའུ་ཚང་ཞིག་ཡོད།

ཞོགས་པ་སྐྱ་མདའ་དང་ལྷན་དུ་བྱེའུ་ཚོས།

རང་དབང་གི་གླུ་དབྱངས་ལེན་འགོ་ཚུགས།

སྡོང་པའི་མདུན་ན་ཁྱིམ་ཚང་ཞིག་ཡོད།

ཁྱིམ་ཚང་ནང་སྐྱེས་པ་ཞིག་ཡོད།

ཁོའི་རང་དབང་གི་གླུ་སྐད་འདི་ལ་སྙན་ངག་ཅིག་འབྲི་བཞིན་ཡོད།