རང་ཉིད་བཅད་ཤུལ་ཀྱི།

བརྩེ་བའི་གྲོགས་མཆོག་དམ་པ་སྐལ་རྡོར་ལགས་སུ།

ཉེ་ལམ་ཉིད་ཀྱི་དོན་དག་ཁ་ཤས་གོ་ལ་བདེ་བར་བདོག་པ་གཞིར་བཅས།

ཆེད་ཞུ།

འདྲིས་རིང་སྙིང་གི་གྲོགས་པོ་ཉིད་ས་མཐའ་ནས་མཐའ་རུ་འཁྱམས་ཏེ་རྒྱལ་ཁམས་རིག་པའི་བསྐོར་བའི་སྐབས་སུ། ཉིད་ཀྱི་གྲོགས་མིང་འཛིན་པ་ཁོ་བོ་དུར་ཁྲོད་ཀྱིས་ཀྱང་སེམས་ཀྱི་སྐད་ཆ་ཡི་གེར་ཕབ་སྟེ་ལན་ཁ་ཤས་ལ་སྤྲིངས་པ་འབྱོར་ཡོད་པ་གཞིར་བཞག དེང་འདིར་ ༡༩༦༡ ལོར་སྨན་རྩིས་ཁང་འགོ་འཛུགས་བྱས་པ་ནས་ད་ལྟའི་བར་གྱི་ལོ་རྒྱུས་ཀྱི་འཕེལ་རིམ་སོགས་ཆལ་ཆོལ་གྱི་བརྗོད་བྱ་དག་ཡིག་ཐོག་ཏུ་ཕབ་འབྲི་དང་དཔྱད་པའི་ཁུལ་གྱིས་ཟླ་གསུམ་ཙམ་ཐལ་བཞིན་ཡོད་པས། མགོ་བོ་འཐོམ་ཞིང་ཁེར་རྐྱང་གི་རྣམ་པས་གདུང་ལ། གྲོགས་པོ་ཉིད་དང་མཇལ་འདོད་ཀྱང་ཤིན་ཏུ་ཆེ་བས་ད་ལན་ཡང་སེམས་ཀྱི་སྐད་ཆ་ཁ་ཤས་ཀ་མད་སུམ་ཅུའི་སྦྱོར་སྡེབ་དང་བསྒྲིགས་ཏེ་ཕུལ་བ་ཡིན་ན་གྲོགས་ཉིད་ཀྱི་ཁེར་རྐྱང་གི་སྐྱོ་བ་མཐའ་དག་སྟོང་བའི་དབྱིངས་སུ་ཞུ་བའི་རྒྱུ་རུ་གྱུར་ཅིག་གུ།

སྤྱིར་འཇིག་རྟེན་འཁོར་བ་འདིར་མིའི་བསམ་པ་ནང་བཞིན་འགྲོ་བའི་ལམ་འགྲོ་ཞིག་དང་ལས་འཕྲོ་ཞིག་ཕལ་ཆེར་མེད་པ་འདྲ་ལ། བརྒྱ་ལ་སྲིད་ཙམ་ཡོད་ན་ཡང་། ཁ་རྒྱུན་ལ། བླ་མ་ཕེལ་ཆེར་ཕྱུག་པོའི་ཁྱིམ་ལ་འཁྲུངས།། མེ་ཏོག་ཕལ་ཆེར་ཆུ་བོའི་འགྲམ་ལ་སྐྱེ། །ཞེས་པ་ལྟར་འབྱོར་ལྡན་གྱི་ཁྱིམ་དང་། རང་དབང་གི་རྒྱལ་ཁབ་དག་གི་ཕུགས་དང་འཕྲལ་གྱི་སྐྱིད་འཛིན་པ་དག་གི་དབང་དུ་འགྱུར་བ་ལས། ངེད་ཅག་ལྟར་རང་ཚོད་མ་ཟིན་པར། རྟག་པར་ཁ་རིན་པོ་ཆེའི་ནང་ནས། གཞན་གྱི་བཀོལ་བྱའི་ཁྱི་དང་བྱ། ཟམ་དང་རི་དང་ཤིང་ལ་སོགས་སུ་འགྱུར་བར་སེམས་སྟེང་ནས་སྨོན་པ་དང་སྨོན་ཁུལ་བྱེད་མི་རྣམས་ལ་རེ་བ་དེ་མེད་པ་འདྲའོ། རང་གི་མགོ་ནས་རྐང་བར་ཞིབ་ལྟ་ཞིག་བྱས་ཤིང་། ཆུང་མི་ལོ་བདུན་ཙམ་ནས་ཅིག་སྦྱོང་ཁུལ་བྱས་པ་ནས་ད་ལྟའི་བར་གྱི་ཐོབ་ཤོར་དང་། དར་རྒུད་ལ་བསམ་གཞིགས་རེ་གནང་ན། སེམས་པ་སྐྱོ་བའི་མི་ཚད། གདོང་པ་མཆི་མས་གང་ཞིང་། མགོ་བོ་བྲང་ཁར་ལྷུང་བའི་རྣམ་པ་ཞིག་རང་བཞིན་གྱིས་མི་སྟོན་དབང་མེད་ལ། ཕྱིར་ཕ་ཡུལ་དུ་འགྲོ་བའི་ལམ་ཁ་ཡང་ཡོངས་སུ་འགག་ཚར་བ་གཞི་ནས་ཤེས། ཁ་རྒྱུན་དུ་དབུས་ཕར་འགྲོ་རྩ་ར་ཚུར་ཡོང་དཀའ། ཞེས་པ་ཞིག་ཡོད་པ་དྲན་ནམ། ང་ནི་འདི་ལྟར་ངང་བ་སེར་བོ་འདྲ་བས་བན་ཆོས་མེད་ཅིག་གི་རྣམ་པར་ཐར་བ་བསྐྱངས་པར་སྐྱོ་ཡང་སྐྱོ་ལ། སུན་ཡང་སུན།

རེད། ལྟོས་དང་། ངས་འདི་ནི་ངའི་ལས་དབང་ལ་ངོས་འཛིན་བྱེད་ལ། འཇིག་རྟེན་གོ་ལ་འདིའི་སྟེང་གི་འཚོ་བ་འདིའི་ཟུར་ཞིག་སྟེ། ཁ་དོག་གི་ཆ་དང་མཛེས་སྡུག་གི་ཆ་རེ་ཡང་ཡོད་ངེས་མོད། ལུང་པ་ཁ་བྱང་བལྟས་ཤིག་གི་ནང་སྐྱེས་པའི་མེ་ཏོག་བཞིན་ཡོད་ཚད་མཐའ་མཇུག་གི་ས་ཚིགས་ཤིག་ཏུ་ཐོན་ཡོད་པ་འདྲ།

ཆེན་པོ་དག་ལ་ངོ་བསྲུང་བའི་གཤིས་ཀ་དེ་སྔོན་ནས་མེད་ལ་བསླབས་ཀྱང་མི་ལོབས་པར་མཐོང་བས་གཡུགས་ལ། རང་གི་འདོད་པ་དེ་གཙོ་བོ་བྱེད་བསམ་གྱི་སྤོབས་པ་ཡང་ད་བར་མ་བསླེབས་པས་སྐྱ་མིན་སེར་མིན་གྱི་ཚད་ཅིག་ལ་བསྐྱལ་ཡོད་པ་ཤེས་པས། ད་ལོ་ ངས་ཀྱང་གྲྭ་ས་ནས་ཆེས་མཐའ་མཇུག་གི་དམག་འཁྲུག་དེ་རྒྱག་པར་འབད་བརྩོན་བྱེད་བཞིན་ཡོད་ལ། རེ་བ་དེ་རྫོགས་སོང་ན། སེམས་པ་ཞིག་དལ་དུ་མཇུག་ཐུབ་པ་འདྲ་ལ། ད་དུང་ཡུལ་ཕྱོགས་ནས་ཀྱང་ཕ་མས་སྤྲད་པའི་མགོ་བོ་འདི་གཞན་གྱི་ཕྲག་སྟེང་དུ་ཚུགས་པར་ངོས་འཛིན་པ་འདྲ་ལ། རིགས་མཐུན་ཁྱུ་ཞིག་ཀྱང་དགའ་སྤྲོ་དཔེ་མེད་པ་རེ་སྐྱེ་བར་མཐོང་བས་བཙན་གྱིས་དམག་འཁྲུག་འདི་མི་རྒྱག་ཀ་མེད་ཆགས། དེ་ཡང་ཡིན་ཏེ་ཆུང་དུས་ནས་འབྱར་བའི་གཤིས་ཀ་ཞིག་གིས་ཀྱང་ཞར་ཞོར་ནས་སྐུལ་མ་བཏང་བས། དུས་དེ་ལ་མ་ཐོན་བར་དུ་ཁོ་བོ་སླར་ཡང་འདི་ནས་གནས་མལ་སྐྱོང་དགོས་པ་འདྲའོ།

རེད་དེ། གྲོགས་པོ། ལན་ཆགས་ཤིག་ཏུ་བརྗོད་ཆོག་གམ། ལས་དབང་ཞིག་ཏུ་ངོས་འཛིན་ཆོག་གམ། སུས་ཀྱང་རང་ཉིད་ཀྱི་ཕུགས་འདུན་དང་འཚོལ་སྙེགས་ལ་འབྲས་བུ་རེ་སྨིན་པར་འདོད་བཞིན་ཡོད་མོད། སྲིད་པ་ཙམ་གྱིས་ད་གཟོད་རང་གི་འདོད་པ་དེར་ལོངས་སྤྱོད་ཐུབ་པ་ལས། འདོད་པའི་འབྲས་བུ་དང་རང་ཉིད་ཀྱི་བར་ཐག་ན་སངས་རྒྱས་ཀྱིས་ཀྱང་ཚད་འཇལ་མི་ཐུབ་པའི་གསང་བ་ཞིག་ཡོད་པ་འདྲ་བས། ད་ནས་བཟུང་མི་ཚེ་ཐུང་ཐུང་འདི་ལ་འཆར་གཞི་ཆེན་པོ་འཐེན་པའི་རེ་བ་དེ་ཡང་མེད་ལ། གང་དགའ་གང་སྐྱིད་ཀྱི་གནས་ཤིག་ཏུ་ལྷོད་ལྷོད་ཀྱིས་འཆམ་འཆམ་རེ་བྱས་ཏེ་ མི་ཚེའི་ཁྲལ་ལས་འདི་མཐའ་རུ་སྐྱེལ་འདོད་ཀྱི་འདུན་པ་སྐྱོ་ལྷང་ངེ་བ་ཞིག་ལས་ཅི་ཡང་མེད། འདི་ནི་ངའི་མི་ཚེ་གང་འཚམ་ལ་སློབ་གཉེར་བྱས་པའི་འབྲས་བུ་རེད་ལ། སྙིང་སྟོབས་ཀྱིས་སྟོང་བའི་གཤིས་ཀ་འདི་ཡང་མཇེ་རྙིད་པ་ཞིག་དང་མི་ནད་པ་ཞིག་གི་ངང་ཚུལ་ཨ་ན་མ་ན་རེད། གོ་རིམ་༼ཚད་ངེས་ཅན་ཞིག་སྒང་ནས་བལྟས་ན་བར་སྐབས་ཤིག་ནས་རང་གི་མདུན་ལམ་དང་རང་ཉིད་ཀྱི་བར་ཐག་ལ་ཁྱོན་ནས་བསམ་བློ་གཏོང་མ་མྱོང་།༽ཟེར་བའི་སྐད་ཆ་འདི་ཁྲི་སྟོང་ཞིག་བཟླས་ཀྱང་ལར་ནས་མ་རྟོགས་པ་ནི་གོ་རིམ་སྟེ། ཐེམ་པ་འོག་མ་ནས་ཐེམ་པ་སྒང་མ་བརྒལ་བ་དང་། ཕྱི་ལོགས་ནས་ནང་དུ་འཛུལ་བ། ཆེན་པོ་ནས་ཆེ་རུ་འཚར་བ་སོགས་གོ་རིམ་ངེས་ཅན་ཞིག་གི་རྒྱས་བཏབ་སྟེ་འདུག་ལ། འདོད་པ་དང་ཧམ་པ་ཆེ་བས་ཕན་ཐོགས་ཅི་ཡང་མེད་པ་ནི་གོ་རིམ་གྱི་རྒྱ་འདི་ཁོ་ན་ཡིན་པ་འདྲ། ཁྱེད་ཀྱིས་སོམས་དང་། རྐ་ནར་ནར་ཞིག་གི་ནང་ཆུ་ནར་ནར་ཞིག་བཞུར་ངེས་ལ། ཤུལ་གོར་གོར་ཞིག་གི་ནང་ཆུ་གོར་གོར་ཞིག་འཁྱིལ་ཡོད་པ་མ་ཡིན་ནམ།༼འདི་ནི་གཏན་ཚིག་དང་རྡོ་རྗེ་བཀའ་རྒྱ་ལྟ་བུ་ཞིག་རེད་འདོད། ལས་ཀ་གང་ཞིག་ལ་ཡང་གོ་རིམ་ཞིག་དགོས་ནི་རེད།༽ འདི་ལྟར་དབྱིབས་དང་འདྲ་བའི་འབྲས་བུ་ཞིག་འབྱུང་ཚུལ་འདིས་ཀྱང་གཉའ་མ་མ་ཚ་བར་བུ་མི་སྐྱེ་བ་དང་། དཀའ་ལས་མ་བརྒྱབ་པར་འབྲས་བུ་མི་འབྱུང་བར་གསལ་འདེབས་གཏོང་བཞིན་པ་ཡོད་པ་རེད། དེ་རིང་དང་ཁ་སང་གཞི་ནས་ཞིབ་འདང་དང་བསམ་གཞིགས་གཏོང་བཞིན་ཡོད་ལ། ལས་སྐལ་གྱི་ཁུར་ཙ་དེ་ཡང་འཚམས་འདི་ནས་ཐང་ལ་འཇོག་པར་འདོད།

གལ་ཏེ་མ་བྱས་པ་དང་མ་འགྲིག་པ་ནི་རང་ངོས་ནས་ཤེས་ཚོད་དེ་ཙམ་གྱིས་མི་ཚད་ན་ཡང་ཐང་མོད། ངོས་ནི་རང་གི་སྐྱོན་ཆ་དང་པོ་ནི་འདི་ལྟར་དུས་ཚོད་འཕྲོ་བརླག་ཏུ་བཏང་བ་དང་། གོ་རིམ་མ་ཤེས་པའི་གནད་འགག་འདི་ཁོ་ནར་ངོས་འཛིན་བྱེད་ཀྱིན་ཡོད་ལ། ཞར་ཞོར་དུ་གྲོང་གསེབ་ཁུག་ཀྱོག་མིང་ལ་དགོན་པ་བཏགས་པ་ཁ་ཤས་ནས་ཀྱང་ལོ་ཡི་ཕྲེང་ཐག་ཁ་ཤས་མི་འདོད་བཞིན་དུ་ཡལ་སོང་བས། ཆེན་པོ་དག་གི་འགྲོས་དང་མཉམ་པའི་སྐད་སྒྲ་ནི་ཕར་ཞོག་རང་མཉམ་སྐྱ་སྟོང་དག་ལས་ཀྱང་ཆེས་སྡུག་པའི་ཚད་གཞི་ཞིག་ཏུ་ལྷུང་ནས་ཡོད། རེད་དེ། འདས་པ་ནི་དེ་འདྲ་ཞིག་རེད་དེ། རྗེས་མའི་འཚོ་བའི་ཐད་ངས་ཀྱས་སྔོན་ཆད་ལོ་གཞོན་གྱི་སྣང་བ་བཙན་པོས་བསླངས་པའི་ཕུགས་འདུན་དེ་འདྲ་དང་། ཆེན་པོ་དག་གིས་ཁད་ཀྱིས་གཅོད་པའི་ནམ་འཕང་དེ་འདྲ་མི་འཛིན་པ་ལས། རང་ཉིད་གཅིག་བུའི་གང་དགའ་གང་སྐྱིད་བྱས་པའི་འཚོ་བ་རལ་པོ་འདི་དང་། ཡུན་རིང་སྙིང་ལ་བཅངས་ནས་བདག་ལ་ཅེར་བའི་ཕ་མ་གཉིས། མི་ལོ་ཉེར་བདུན་ལ་གང་ཞིམ་གང་མངར་ཟོས་པའི་ཟས་རིན་སོགས་ཀྱི་དོད་ཙམ་ཞིག་འཇོག་པར་འབད་བརྩོན་མུ་མཐུད་བྱེད་ངེས་ལ། ད་ལྟའི་འཚོ་བ་ལས་ལོག་པའི་ངོས་གཞན་ཞིག་དང་ཟུར་གཞན་ཞིག་ནས་འདོད་མོས་དང་སྟབས་བསྟུན་གྱིས་འབྲས་བུ་ཞིག་ལེན་པར་ཤུགས་ཀྱིས་གཞིག་གིན་ཡོད་ལ། དེ་ལྟ་བུ་ཞིག་བརྒྱུད་པར་གོ་རིམ་གང་འདྲ་ཞིག་བརྒྱུད་དགོས་པར་སྔོན་ཚུན་ནས་གྲ་སྒྲིག་དང་ལམ་ཁ་བཟོ་བཞིན་ཡོད་པས། ཆེན་པོའི་རྐང་འོག་ཏུ་ཟགས་པའི་དམའ་བ་ང་ཡང་ད་དུང་མགོ་འཕང་མཐོན་པོའི་ངང་ཚུལ་ནི། ཁ་རྒྱུན་དུ། ཁ་དཀར་རྐྱང་དང་ཅང་ཤེས་རྟ། ། ཤི་ཡང་མགོ་བོ་མི་དམའ་བ།། འཆི་བར་སྐྲག་པ་མི་ཡིན་ཏེ།། ཅང་ཤེས་ཡོངས་ཀྱི་དཔའ་ཚུལ་ཡིན་ཞེས་པ་ལྟར་རོ།

ཨོ་རེད། ད་དུང་བཤད་དགོས་པའི་སྐད་ཆ་ཚིག་གཅིག་ལྷག་ཡོད་པ་ནི། ཉིད་ཀྱང་ས་མཐའ་ནས་འཚོ་གྲང་ཤུར་ཤུར་ཞིག་རོལ་ཀྱིན་ཡོད་སྐབས་༼དགའ་སྤྲོའི་ཁེངས་པའི་དུས་ཀྱང་ཡོད་སྲིད་མོད་འདིར་གླེང་མེད།༽ཁེར་རྐྱང་གི་སྣང་བ་དང་ཡོད་ཚད་འཕྱི་སོང་བའི་སེམས་ཚོར་དྲག་པོ་རེ་སྐབས་རེ་བསྟུན་མུར་བྱུང་ཡོད་ངེས་ལ། དེ་དང་དེ་དག་གི་སྐབས་སུ་ཡང་ཅིས་ཀྱང་ཡིན་ངེས་པ་ནི་འོག་ནས་སྒང་དུ་འགྲོ་བའི་གོ་རིམ་དང་། མཐོ་ས་ནས་དམའ་སར་སྟུག་སེ་ལྷུང་འགྲོ་བའི་རྒྱུ་མཚན་འདི་ཡིན་ཁོ་ཐག་ཡིན་པས། སྐབས་བསྟུན་གྱི་བསམ་བློ་དང་སེམས་ཚོར་དེའི་དབང་དུ་མི་གཏོང་བར་ད་ནི་བྱ་བའི་ལས་སུ་ཧར་གྱིས་འཇུག་རིག་སྟེ། འཚོ་བ་གསར་བ་ཞིག་གི་འགོ་བཙུགས་ཟིན་ལ་གསར་དུ་བཙུགས་པ་ཡང་ཡིན་པས། འབད་པས་བསྐྱངས་པའི་མི་ལོ་བཅུ་ལྷག་གི་གྲུབ་འབྲས་དོར་ཤུལ་ནས་ཡང་བསྐྱར་འགྲེང་བཞིན་པའི་རྣམ་པ་ཞིག སྤྱི་ཚོགས་འདི་དང་ཁད་ཉེ་བའི་ཡུལ་མི། རེ་བལྟས་འཆའ་བའི་ཕ་མ། རྒྱབ་ཏུ་འགྲེང་པའི་གྲོགས་པོ། དེ་དང་ལྟ་བུའི་གནོན་ཤུགས་ཀྱི་ར་བ་ཞིག་བརྒལ་བའི་སྟ་གོན་ཡོད་ཀྱང་ངེས་ལ་ཡོད་ཀྱང་དགོས་པ་ཁོ་བོའི་སྐད་ཆ་ཐ་མ་སྟེ། བློ་ཡི་གཏིང་ལ་སིམ་སིམ་མི་འབབ་ཀྱང་དཔྱད་པའི་ངོས་ལ་ཁད་ཀྱིས་ལྷུང་བའི་ཡིད་ཆེས་དགུ་བརྩེགས་དང་བཅས་གནས་མཆོག་ཛ་ལན་དྷ་ར་དང་ཁད་ཉེ་བའི་གངས་སྐྱིད་གཤོངས་ཀྱི་རང་ཤག་ཆང་ཁང་ནག་པོ་ནས་ང་དུར་ཁྲོད་ཀྱིས་སྤྲིངས་པའོ།

སེམས་འདི་སྐྱོགས་ཀྱིས་མ་བཅུས་ཤིང་།།

ལུས་འདི་ཚོན་གྱིས་མ་བསྒྱུར་མོད།།

ངལ་བས་བསྐྲུན་པའི་རིན་ཐང་ནི།

རྐང་པ་བརྡར་བའི་ཤུལ་ཙམ་མོ།།

རང་གི་སེམས་ཀྱིས་མ་བཏང་ཞིང་།།

ད་དུང་དུངས་ཀ་ཆེ་བའི་གྲོགས།།

གང་ན་བཞུགས་པ་དེའི་དྲུང་དུ།།

རྒན་པོའི་སྐད་ཆ་འདི་བསྐུར་དོ།།

20༡༡.༩.༣༠ ཉིན།

མགོ་ལ་མགོ་ཡི་ལྟ་ཚུལ་དང་། རྐང་པ་རྐང་པར་འདུག་ས་ཞིག་དགོས།

འཇིག་རྟེན་ནས་གླུ་ཞིག་ལེན་པའི་སྟ་གོན་ཡང་ཡང་བྱས་མོད། མགྲིན་པ་ཞིག་བསལ་ཅིང་། ཉམས་འགྱུར་ཞིག་བཟོས་ཚར་དུས། ཆུ་ཚོད་ནི་རྒྱུན་མཐུད་ནས་འགྲོ་བའི་རྒྱུ་མཚན་རྟོགས་ལ། གོ་རིམ་ཞིག་དང་རྨང་གཞི་ཞིག་མེད་ན། དར་ལྕོག་དེ་རི་བོའི་རྩེ་ནས་རླུང་གིས་བསྐྱོད་མི་སྲིད་ལ། འཛུབ་མོ་འགུལ་སྟངས་ཙམ་གྱིས་གླིང་བུ་ག་འདྲ་ཞིག་གྲགས་ཀྱིན་པའང་རྟོགས་མི་སྲིད་དོ། ཡོོད་ཚད་ལ་འགུལ་སྟངས་ཤིག་དང་གོ་རིམ་ཞིག། ཉམས་མྱོང་ཞིག གནས་ལུགས་ཤིག་ཡོད་དཔེ་ན། ཁྱེད་རང་ཐེམ་པ་འོག་མ་མེད་པའི་ཐེམ་པ་སྒང་མ་ཞིག་ལ་འགྲོ་འདོད་ཡོད་ཀྱང་། དེ་འདྲ་ཞིག་ད་དུང་ཡིན་པ་མི་སྲིད་པའི་ཤེས་བྱའི་གྲས་ན་མ་གཏོགས་མི་འདུག་གོ།

རང་ཉིད་ལ་མགོ་མཇུག་མེད་ཀྱང་རུང་སྟེ། ཁྱོད་ལྟ་བུ་ཞིག་གིས་ད་དུང་འཇིག་རྟེན་གྱི་འཁོར་ཕྱོགས་བསྒྱུར་མི་བཏུབ་ལ། ཡིན་ལུགས་ཀྱི་བདེན་པ་ནི་དེ་བས་ཀྱང་བཤིག་མི་ཐུབ་བོ། ཐམས་ཅད་ལ་མགོ་མཇུག་ཡོད་མེད་ནི། གོ་རིམ་ཞིག་གི་ངོས་ནས་བལྟ་དགོས་ལ། གཙོ་སྒྲུབ་ཅིག་གི་ངོས་ནས་ཀྱང་བརྡར་དགོས། རྒྱུ་མཚན་ཞིག་འཆད་རྒྱུ་ཡོད་པས་མི་ཆོག་པར། མངོན་སུམ་ཞིག་སྟོན་རྒྱུ་ཡང་ཡོད་དགོས་པས། ལྷ་སྒྲུང་ཞིག་བཟོ་ཤེས་པས་མི་ཕན་ལ། མང་པོ་ཞིག་ཁ་མཐུན་པས་ཀྱང་མི་ཆོག་གོ།

ཁྱོད་ལ་ཡང་རྒྱུས་མངའ་ཡོད་ངེས་པ་ནི། རང་གི་ལག་པའི་ཕྱི་ནང་དང་སེམས་ཀྱི་འདོད་ཕྱོགས་དེ་ཡིན་པས། ཆེན་པོ་ཆེན་པོ་ཞིག་བཤད་ནས་མི་ཕན་ལ། ཆུང་ཆུང་ཞིག་ཡིན་པས་ཀྱང་མི་གཏོང་བ་ནི། འཆི་བ་ལྟ་བུའི་སྡོམ་ཚིག་འདི་དག་ཡིན་པས། ཁྱོད་ལ་ཕྱི་མའི་རྣམ་བཤད་མེད་ཀྱང་ཆོག་མོད། ལན་ཞིག་ངེས་པར་འདེབས་དགོས་པ་ནི་དྲི་བ་འདི་ཙམ་མ་ཡིན་པར་ཧ་ཅང་མང་བས། བཙུར་ནས་ཁུགས་མ་དང་། དེ་ཡང་རླུང་ལ་མ་སྤུར་བར་གོ་རིམ་ཞིག་གི་ར་བ་འདི་བརྒྱུད་པ་ཤེས་སམ། གོ་རིམ་ནི་འཚར་ལོངས་བྱུང་བའི་བརྒྱུད་རིམ་ཡིན་པས། བྲེལ་འཚུབ་དང་ལྷོད་གཡང་གིས་བར་མི་ཆོད་པར། ཆུ་བོ་བཞིན་རྒྱུན་གྱིས་དང་། ཡུན་གྱིས་བཞུར་བཞིན་ཡོད་དོ།

གཤིས་འདི་བསྐྱུར་བས་མི་འགྱུར་ཞིང་།།

ཤ་འདི་རུས་པ་མ་ཡིན་པས།།

ངལ་བའི་སུག་རྗེས་རེ་རེ་ནི།།

ཁྲག་དང་མིག་ཆུས་ཉོས་པ་ཡིན།།

ང་དུར་ཁྲོད་ཀྱི་སྙན་ངག་རིང་མོ། ས་སྲོད་ཀྱི་སྙན་ངག

ལེའུ་དང་པོ།
བྱ་ཆེན་ཚང་མལ་རི་བོའི་ཟོམ་དུ་ལུས་སོང་།།
སྲོད་ཀྱི་གླིང་བུ་སྟོང་བའི་དབྱིངས་སུ་བཏབ་སོང་།།
ཁྱོད་ལ་ཐད་ཀར་བཞག་པའི་སྐད་ཆའི་ཁྲོད་ནས།།
ཞེ་འདང་རྗེན་རྗེན་ཞིག་གི་ཁ་དོག་རྙེད་བྱུང་།།

གྲོང་གི་སྲང་དུ་བརྡུང་བའི་ཞབས་བྲོ་དེ་དང་།།
ཡུན་རིང་སེམས་སུ་ཉར་བའི་སྙིང་གཏམ་ཟུང་ཞིག།
ཁྱོད་ཀྱི་གཞིས་ཁྱིམ་དེ་ལ་མགྲོན་དུ་ཆས་དུས།།
སྲོད་ཀྱི་ཉི་མ་བུ་མོའི་མཁུར་ཚོས་འདྲ་བྱུང་།།

ཕྱི་དྲོ་ཉི་མའི་འོད་ལ་དམར་མདངས་མནབས་ཤིང་།།
དགུང་ཁའི་བྱ་ཆེན་དག་གིས་ཚང་མལ་སྙེག་དུས།།
སྔོང་མགོའི་ཤིང་ཏོག་འཐུ་བའི་བུ་མོ་མཐོང་བྱུང་།།
རྔུལ་ཆུ་ཁྲོམ་ཁྲོམ་བཞུར་བའི་ཞལ་ཡང་མཐོང་བྱུང་།།

ཁྱོད་ལ་བཏབ་པའི་ས་བོན་གསོན་ཤུགས་རྒྱས་བྱུང་།།
དེ་རུ་འབུས་པའི་མྱུ་གུ་སྐྱེ་སྟོབས་ཆེ་སོང་།།
ལམ་ཁར་ངལ་གསོ་རྒྱག་པའི་གྲུ་ཟུར་དག་ཏུ།།
ང་ཡི་གསང་བ་བརྡོལ་བས་རི་བོ་འགུལ་བྱུང་།།

བལྟས་ན་གསེར་གྱི་ཞིང་ཁ་མཛེས་མཛེས་འདྲའོ།།
མཐོང་ན་རི་བོའི་ཟོམ་དེ་སྐྱིད་སྐྱིད་འདྲའོ།།
འཇིག་རྟེན་འཁོར་བའི་ངོས་སུ་བཏགས་པ་འདི་དག།
འུ་གཉིས་མཉམ་དུ་འབོད་པའི་ཕོ་ཉ་ཡིན་སོང་།།

ལམ་གྱི་མདོ་རུ་འཛོམས་པའི་ཁ་ཆད་བཞག་ཅིང་།།
ཆུ་ཚོད་དྲུག་པར་ཁ་པར་བརྡ་འཕྲིན་བསྐུར་ནས།།
མཐུན་པའི་ལམ་ཡིག་སྒང་དྲུག་ཡུལ་དུ་འཁུར་དུས།།
ཁྱོད་ནི་དེང་གི་རྗེ་བཙུན་སྒྲོལ་མ་ཡིན་ནོ།།

ལེའུ་གཉིས་པ།
ཁྱོད་ཀྱི་ཕྱག་ཟུང་མཉེན་མོས་བརྡ་ཞིག་བསྟན་ཞིང་།།
འཇམ་པོའི་ངག་གིས་བརྩེ་བའི་སྒོ་མོ་ཕྱེས་ནས།།
ལྷོ་ཕྱོགས་ཉི་མ་ནུབ་པའི་ས་སྲོད་འདི་ལ།།
བག་ཕེབས་འཚོ་བའི་ཟུར་ཞིག་འདི་ལྟར་བསྟན་སོང་།།

ལྗོན་ཤིང་འདབ་ལོ་འཛིངས་པའི་ཁོར་ཡུག་ཀུན་ཏུ།།
སྲོད་ཀྱི་རླུང་བུ་འཇམ་པོ་ཡང་ཡང་འཇུས་ཤིང་།།
ཙད་པའི་སྡུག་བསྔལ་བསྡུ་བའི་ཁྲལ་བ་སླེབས་སྐབས།།
ཕྱི་རོལ་ཡུལ་འདི་ལྷ་ཡུལ་ལས་ཀྱང་མཛེས་སོང་།།

མཚམས་སྤྲིན་གོས་ལ་མནབས་པའི་སྲོད་ཁ་མཛེས་སོང་།།
ཞལ་ངོ་འཛུམ་གྱིས་གང་བའི་གྲོགས་ཁྱོད་དགྱེས་སོང་།།
ལམ་གྱི་གཡས་གཡོན་དག་ནས་བྱེའུ་ཚོགས་ཀྱིས།།
སེམས་ཀྱི་སྐྱོ་བ་སེལ་བར་སྐད་སྙན་བསྒྱུར་སོང་།།

ངེས་མེད་གོམ་ཁ་ནོར་བུ་རི་ལ་བསྒྱུར་ནས།།
ང་ཡི་མགྲིན་པ་ཁྱོད་ཀྱི་འབོད་པར་བསུས་ཤིང་།།
ཕྱག་ཟུང་དྲོན་མོ་བརྩེ་བར་མཉམ་དུ་བརྒྱུས་དུས།།
དབེན་དགོན་དེ་ལ་གསེར་གྱི་རྒྱ་ཕིབས་གཡོགས་འདུག།

མེ་ཧེ་དག་ནི་མཚེའུའི་ཕང་བར་རྩེ་ཞིང་།།
གླང་ངུ་དག་གི་སྒལ་བར་ངང་ཆུང་འབབ་པའི།།
ལྷོད་ལྷོད་འཇམ་པོར་གནས་བའི་སྲོད་ཀྱི་དུས་སུ།།
ངུར་སྨིག་རླུང་ལ་བསྐྱོད་པའི་མཆེད་གྲོགས་སྐྱིད་དོ།།

རྡོ་བའི་ལམ་ནི་གཞིས་གྲོང་མཐའ་རུ་བརྟོལ་འདུག།
དེ་ཡི་འགྲམ་དུ་ཆུ་ཡིས་ཤུར་མ་བརྐོས་འདུག།
ལམ་གྱི་འཐའ་རུ་ཤིང་སྡོང་བསྟར་འཕྲེང་བསྒྲིགས་འདུག
དེ་ཡི་འོག་ཏུ་འཆམ་འཆམ་འགྲུལ་བ་མང་ངོ།།

ཁྱོད་ཀྱི་གཤིས་ཀ་དེ་འདྲའི་ལྷོད་ལྷོད་ཅིག་རེད།།
ང་ཡི་སེམས་ལ་བག་ཆགས་མཐུག་པོ་བཞག་སོང་།།
ས་སྲོད་འདི་ལ་སྙིང་གི་གཏམ་དག་སྨྲས་བས།།
རང་གི་སེམས་པ་མཚོ་ནང་ནོར་བུ་ཡིན་སོང་།།

ཞོགས་པའི་ཆར་བས་ས་གཞིར་ཁྲུས་ཤིག་བསྐྱོན་པས།།
ང་ཡི་མིག་ལམ་དར་ཚོན་སྣ་ལྔ་ཡིན་སོང་།།
ལམ་གྱི་གོམ་ཞེང་ལག་འཇུ་དྲོན་མོས་གཅོད་དུས།།
ཁྱོད་ནི་ལམ་སྣེར་བཞད་པའི་མེ་ཏོག་ཡིན་སོང་།།

ནུབ་ཁའི་ཉི་མ་རི་ལ་སྟོད་ཐུབ་མ་བྱུང་།།
ཉི་མའི་ཞལ་གྱི་དམར་མདངས་མུན་པས་བསྡུས་སོང་།།
ཤར་མཐའི་སྐར་ཆེན་གཞོན་ནུའི་ཚུལ་གྱིས་རྒྱུ་དུས།།
བདག་གི་སེམས་པ་འོད་དང་མེ་ལྕེ་ཡིན་སོང་།།

ལེའུ་གསུམ་པ།
དགུང་ཁའི་སྐར་ཚོགས་སེམས་ཀྱི་གདན་ལ་བཞུགས་ཤིང་།།
དཀྱིལ་གྱི་ཟླ་བ་ཉི་མའི་ཞེ་འདང་བཞག་སྟེ།།
སྲོད་ཁའི་སྙིང་གཏམ་འཆད་པའི་གྲོགས་པོ་དེ་དང་།།
མཚན་གྱི་ཞག་མལ་ཤིང་ནགས་མཐའ་རུ་ལུས་སོང་།།

འདི་ནི་ལས་དབང་ཞིག་གི་བཀོད་སྒྲིག་མ་རེད།།
འདི་ནི་སྟེས་དབང་ཞིག་གི་མཇལ་འཛོམས་མ་རེད།།
སེམས་དང་སེམས་པ་བརྒྱུས་པའི་དམ་ཚིག་ཁ་ལ།།
དགོད་སྒྲ་ཡང་ཡང་མཆེད་པའི་ཁ་བྱང་ཡིན་སོང་།།

མཚན་གྱི་སྨག་གིས་མི་ཚོགས་ཁང་པར་བདས་སོང་།།
ཁྱི་ཡི་སྐད་ཀྱང་ཆུང་ནས་ཆུང་དུ་འགྲོ་སོང་།།
སིར་སིར་འཕུར་བའི་ནགས་ཀྱི་བྱེའུའི་ཚོགས་ཀྱང་།།
ཚང་མལ་ནང་དུ་རྨི་ལམ་རྩེ་རོགས་བསྡུས་སོང་།།

ཀྱེ་མ་ས་ཡི་རླུང་གིས་བྱིལ་བྱིལ་གནང་ཞིང་།།
མུན་པ་ཡིས་ཀྱང་ཁོ་བོར་བགོ་སྐལ་བསྩལ་བྱུང་།།
འདར་འདར་ལག་པས་མདུན་གྱི་རི་ལ་བསྙབས་པས།།
ང་ཡི་ཡོད་ཚད་བདེ་དགའི་དབྱིངས་སུ་འཁྱོངས་སོ།།

ཁུ་སིམ་མཚན་མོ་སེམས་ཀྱི་དབྱངས་ལ་མནལ་ཞིང་།།
རུས་པའི་རྐང་ལ་ཟུག་པའི་ན་ཟུག་དཀྲོལ་དུས།།
ང་ཡིས་རྨི་ལམ་དེ་ཡི་སྙིང་བོ་མཐོང་བྱུང་།།
ལོ་བརྒྱར་རྒས་པ་མེད་པའི་གདངས་ཀྱང་ཐོས་སོང་།།

ནམ་མཁའི་དགུ་ཚིགས་དོ་ནུབ་ལམ་དུ་བྱས་ནས།
སྔོ་ནག་མུན་པའི་ས་གཞི་ཧྲིལ་གྱིས་བཀབ་འདུག།
ཁྱོད་ཀྱི་འཛུམ་ཆུང་དྭངས་མོས་སེམས་པ་ཚིམས་ཤིང་།།
ལུས་ཀྱི་ལན་ཆགས་དག་པས་འགྲུལ་ལམ་བདེ་སོང་།།

སྐྱ་རེངས་ཨ་ཅེ་དགོན་ཀྱིན་དགོན་ཀྱིན་བསླེབས་སོང་།།
གླང་རྫི་རྒན་པོ་དག་ཀྱང་ཞོར་ལ་ཐོན་སོང་།།
ང་ཡི་ལྷིང་འཇགས་རྨི་ལམ་དེ་ནས་སངས་པས།།
ཞོགས་པའི་མཁའ་དབུགས་མི་ཚེ་གསར་བ་ཡིན་འདུག།

མདང་ནུབ་གྲོགས་ཀྱི་བརྩེ་བས་སེམས་པ་བསྐྱངས་ཤིང་།།
ལུས་ཀྱི་བདེ་བ་རང་རང་སེམས་ལ་ཉར་བས།།
ལམ་གྱི་ལྗོན་ཤིང་མགོ་ལྕོག་ལྡེམ་ལྡེམ་བྱེད་ཅིང་།།
ཟུར་གྱི་རྡོ་བ་དག་གིས་ལམ་ཁ་གནང་སོང་།།

ལེའུ་བཞི་པ།
ཁྱོད་ཀྱི་འཛུམ་མདངས་སེམས་ཀྱི་གཏིང་ལ་འཁོར་ཞིང་།།
ནུབ་ཁའི་ཉི་གཞོན་འོག་གི་གདན་ལ་བསམ་གྱིན།།
སྲོད་ལ་བྱམས་པ་བཙལ་བའི་བུ་ཆུང་ཞིག་གི།།
སྐྱོ་བའི་སྐྱོ་གླུ་ཨ་སྔོན་སྤྲིན་རྒྱབ་བསྙེགས་སོང་།།

བུ་མོ་དག་གིས་སྙན་པའི་སྐད་བརྡ་བསྒྱུར་སོང་།།
བྱེའུ་ཆུང་ལ་ལས་སྐྱིད་པའི་གནས་ལམ་བསྒོམས་སོང་།།
བྱ་ཆེན་རི་ལ་འཁོར་བའི་སྲོད་ཁ་འདི་ལ།།
བྱམས་པ་ཁྱོད་རང་མ་གཏོགས་དྲན་རྒྱུ་ཅང་མེད།།

དགུ་ཚིགས་སྐྱ་རེངས་བུ་མོ་ཕར་ལ་སྐྱེལ་ཞིང་།།
ངག་རིག་ཀུན་རྟོགས་ལྷ་མོའི་མཛེས་པ་འཁྱེར་བའི།།
ན་ཉིན་ལོ་དང་བསྡེབས་པའི་ཁྱོད་ཀྱི་མགུར་དབྱངས།།
དོ་ནུབ་དྲན་པ་རྐུ་བའི་ཕོ་ཉར་བསླེབས་སོང་།།

དགུན་མལ་གནས་སུ་ཁྱོད་ཀྱི་རྐང་རྗེས་བབས་སོང་།།
མཚན་མོའི་སྨག་ལ་སླར་ཡང་གསང་འཕྲིན་བསྐུར་ཆོག།
སྐར་ཚོགས་གྲངས་སུ་ཚོགས་པའི་འཇིག་རྟེན་ཁམས་སུ།།
ཁྱོད་ཀྱི་ཞལ་རས་འདྲ་བའི་ཟླ་བ་མཐོང་བྱུང་།།

ཟླ་འོད་མོག་མོག་བསིལ་འཇམ་རླུང་བུས་ཁུར་སོང་།།
ཚོར་སྣང་སྲབ་མོ་མཛེས་པའི་མུན་པར་འཕྱོ་སོང་།།
མི་ཚེའི་སྒལ་གཤོང་འགྲིམས་པའི་རེ་འདོད་དེ་ཡང་།།
ཡུན་གྱིས་བསམ་ན་ཁྱོད་ཀྱི་རྒྱབ་གཟུགས་ཙམ་རེད།།

ལོ་ཟླ་འདི་ལྟར་བཅད་པས་འཚོ་བ་མཐོང་སོང་།།
དེ་ཡི་དབྱིངས་སུ་ཞུགས་པའི་མི་ཡང་མཐོང་བྱུང་།།
ཨ་ཐང་ཆད་པའི་སྐྱོ་གླུ་དབྱངས་སུ་འགུགས་པའི།།
ང་ཡི་ལྷ་དང་ལྷ་མོའི་ཚོགས་ཀྱང་མཐོང་བྱུང་།།

མི་ཡི་མིག་ཟུང་སྒྲིབ་པའི་མུན་པ་དག་ནི།།
འོད་ཀྱི་ཕུང་བོ་ཡུལ་བའི་ཤུལ་དུ་འཚངས་ཏེ།།
སླར་ཡང་འཇིག་རྟེན་བཞེངས་པའི་ངང་ཚུལ་མཐོང་བས།།
ང་ལ་ཡང་བསྐྱར་གསོན་པའི་སྤོབས་པ་རྙེད་སོང་།།

འབའ་ཆུ་ལམ་ལམ་བཞུར་བ་ང་ཡིས་མཐོང་སོང་།།
འབའ་གཞས་ལྷང་ལྷང་གྲགས་པའི་དུས་ཀྱང་བསླེབས་སོང་།
ལུང་པ་ཕར་རྒྱབ་དེད་ནས་རང་ཡུལ་བསྙེགས་ཚེ།།
ང་ཡི་སེམས་པ་ཆུ་ཤེལ་དྭངས་མོ་ཡིན་འགྲོ།།

སྣང་བ་འདི་དག་སྐད་ཅིག་ཡུན་ལ་བསྡུས་ཤིང་།།
དགའ་བ་དེ་དག་རི་མོའི་གཟུགས་སུ་ཕབ་ཏེ།།
རང་ཁང་གྲུ་བཞིར་སེམས་ཀྱི་མེ་ཏོག་བཙུགས་ན།།
དེ་ནི་ལྷ་ཡུལ་ལས་ཀྱང་སྐྱིད་པ་ཡིན་སྐད།
རྒྱ་གར་གྱི་གྲོང་ཁྱེར་ཝཱ་ར་ཎ་སིར་2010.11.2.ཉིན་བྲིས།

གྲང་འདར།

གྲང་འདར།

སང་རྡོར།

རྩིག་ངོས་ཆུ་ཡིས་བཞུར་བའི་ཞག་སྨད་ཅིག་ལ། །
ཁོ་བོ་མུན་པའི་གཟུགས་ཀྱིས་ཁྱིམ་ལ་འཐིབས་ཡོད། །
ཁྱིམ་ནི་དཀར་མེ་ཡང་ན་སྣ་སྒྲ་ཧྲེང་ཧྲེང་། །
ཁྱིམ་ནི་ཡི་གེ་དང་ཡང་ན་སེམས་ལྡན་ཐུ་བ། །
ཞི་ལའི་མིག་འབྲས་ལྗང་གུ་འོད་ཆུང་འཚུབ་འཚུབ། །
ང་ཡི་འགུལ་སྐྱོད་ཕྲ་མོ་གྲིབ་སོ་ལང་ལོང་། །

རྩིག་ངོས་ཆུ་ཡིས་བཞུར་བའི་ཞག་སྨད་ཅིག་ལ། །
ཁོ་བོ་རྨོ་མཛོའི་གཟུགས་ཀྱིས་ཞིང་ཁར་ཕྱིན་ཡོད། །
ལམ་ནི་སྐར་མདའ་ཡང་ན་ཁེར་ལབ་ཐན་ཐུན། །
ལམ་ནི་སྟོང་འཇགས་ཡང་ན་རྣམ་ཤེས་ཕྱེད་པ། །
ཕྱོགས་ཀྱི་གྱང་གོག་ཅིག་ན་ངུད་མོ་སྦུད་སྦུད། །
ང་ཡི་ནང་སེམས་དམར་པོ་སྐྱུར་ཤ་གཟེར་གཟེར། །

2011-2-18

མིང་མེད།

ང་ཡི་ཉམས་སྣང་ལ། །
གསེར་གྱི་ཀུ་ཤ་མཐོང་། །
རྩེ་མོ་ནུབ་ཏུ་བསྟན། །
གཡའ་ལོ་བསྟུད་མར་འབབ། །
སྤྲིན་སྣ་ངང་གིས་ཆད། །
ང་ཡི་ཉམས་སྣང་ལ། །
སྙན་ཤལ་སིལ་སིལ་འདར། །
མཛོད་སྤུ་ཡེར་ཡེར་གཡོ། །

ང་ཡི་ཉམས་སྣང་ལ། །
ནགས་ཀྱི་སྤྱིལ་བུ་མཐོང་། །
སྒོ་མོ་བྱང་དུ་འཁོར། །
དྲིལ་ཆུང་སིང་སིང་འཕུར། །
མེ་ཏོག་བགས་ཀྱིས་འཐོར། །
ང་ཡི་ཉམས་སྣང་ལ། །
ཤིང་ཁང་ཁམ་སོལ་སོལ། །
ཤིང་འབྲས་མངར་ཐུལ་ཐུལ། །

ང་ཡི་ཉམས་སྣང་ལ། །
པད་རྩའི་མཁྲིག་མ་མཐོང་། །
དངུལ་གདུབ་འོད་ཀྱིས་འཁོར། །
རྨ་བྱ་ཁྲ་སྒོང་སྒོང་། །
ལུག་ཆུང་གཤིས་ཀྱིས་རྩེད། །
ང་ཡི་ཉམས་སྣང་ལ། །
འུར་ཐག་དཀར་ཤད་ཤད། །
མཚམས་སྤྲིན་སེར་ཧང་ཧང་། །

2011-2-18

མདང་ནུབ་ཡང་།

མདང་ནུབ་ཡང་།
སེང་རྡོར།

ཀྱེ་མ་མདང་ནུབ་ང་ཡི་རབ་གསལ་ཁ་ནས། །

གཡུ་ཡི་སྨིན་མ་ཞིག་གིས་སྐེ་སོ་ལྟའོ། །

ཀྱེ་མ་མདང་ནུབ་ང་ཡི་མཆོད་སྒམ་ངོས་སུ། །

ཞལ་འབག་ནག་པོ་ཞིག་གིས་དབུ་ཉུག་བྱེད་དོ། །

བྲང་གཞི་ཆེན་པོ་དེ་ཡིས་རྡོ་རྗེ་གསོར་རོ། །

ཟླ་བ་ཁམ་པ་དེའང་གདུགས་ལྟར་འཁོར་རོ། །

ཀྱེ་མ་མདང་ནུབ་ང་ཡི་རྣ་ཅོག་བུག་ནས། །

རས་པ་ཉམ་ཐག་ཅིག་གིས་བྱ་འབོད་འདོན་ནོ། །

ཀྱེ་མ་མདང་ནུབ་ང་ཡི་མལ་ཁྲིའི་ལོགས་སུ། །

ཀ་ལི་ཕྱེད་པ་ཞིག་གིས་དབུ་སྙུང་བཅས་སོ། །

ཕྱག་དཔེ་མདའ་ཚད་མ་ཞིག་རྟ་སྐད་སྒྲོག་གོ །

སྤྱང་ཐོ་ལྷམ་མགོ་ཅན་ཡང་རླུང་གིས་གསིག་གོ །

ལྟོས་དང་ཕར་ཞིག་ནམ་མཁའི་སྒོ་འཕར་ནང་ན། །

གཡུང་དྲུང་བཀའ་གཙིགས་ཁུར་བའི་གཤོག་པ་མཐོང་ཞིང་། །

སྐར་མའི་ཐོད་ཕྲེང་བཞེས་པའི་མཚན་མོའི་པང་དུ། །

མཐའ་ཆགས་ལྷ་ཡིས་བྱས་པའི་མངའ་རིས་གསལ་སོང་། །

རབ་རིབ་བསང་མེའི་ངོགས་སུ་ཡོབ་རྡུང་ཐོས་འོང་། །

ཕན་ཕུན་དར་ལྕོག་གསེབ་ཏུ་སྣ་སྦྲིད་གོ་འོང་། །

ལྟོས་དང་ཚུར་ཞིག་ང་ཡི་སྡོད་ཁང་ཀླད་ལ། །

དུས་གསུམ་སྣོད་དུ་བསྒྲིགས་པའི་དཀར་ཆ་བབས་ཏེ། །

བརྒལ་མེད་ན་བུན་འཐིབས་པའི་བང་རིམ་རེ་རེར། །

ལོ་ཟླའི་ལྷ་སྒྲུང་རིང་མོ་སྟག་ཤ་བྲིས་འདྲ། །

སྐྱ་མདའ་མ་གསལ་བར་དུ་རྨིག་སྒྲ་བྱུང་ངོ་། །

མུན་པ་མ་འཛད་བར་དུ་རྔ་སྒྲ་གྲག་གོ །

ཀྱེ་མ་ད་དུང་ལྗང་ལོའི་ཤམ་ཐབས་ཅན་ཞིག །

སེང་ལྡེང་ནགས་མའི་ཚལ་དུ་བྱང་ལ་གཟིགས་ཤིང་། །

ཀྱེ་མ་གཞན་ཡང་པད་མའི་དགྲ་སྟ་ཅན་ཞིག །

དུར་ཁྲོད་བསིལ་བ་ཚལ་དུ་ཤར་ལ་ཆས་སོ། །

ཉི་མ་དམར་ཐག་ཆོད་དུས་མ་ཎི་ལྷང་ལྷང་། །

གྲྭ་པ་བཤུམས་ཐག་ཆོད་དུས་མི་རོ་ཐར་ཐར། །

ལས་ཀྱི་མགྲོན་བུ་སྤྲས་པའི་སྦྲང་མ་དེ་ཚོ། །

མདང་ནུབ་ངེད་ཅག་སྐྱོ་བའི་སྐྱོ་རོགས་ཡིན་སོང་། །

འགྲོ་དྲུག་ཕྱག་ངོར་གཟིགས་པའི་དཀྱིལ་ཀྲུང་དེ་ཚོ། །

མདང་ནུབ་ཁྱེད་ཅག་སྡུག་པའི་སྡུག་རོགས་ཡིན་སོང་། །

འདི་ན་སུ་ཡང་ཉི་ཟླའི་མཐའ་གཉིས་ཡིན་པས། །

འབྱུང་བཞིའི་དོ་ཤི་དོ་ཆད་ལབ་ཚོད་མ་ཡོད། །

བྱང་ཐང་གི་དུར་ཁྲོད།

Wednesday, August 03, 2011

3:59 AM

ང་ནི་བྱང་ཐང་གི་དུར་ཁྲོད་ཅིག་ཡིན

ཇི་ཙམ་གྱིས་ཚད་མ་བཟུང་བ་དེ་སྲིད་དུ

ང་ལ་འཇིགས་ཡེར་ཡེར་གྱི་རྨི་ལམ་མང

སྟོང་ཞིང་དབེན་པའི་ས་སྲོད་ཀྱི་རླུང་བ་འཇགས་དུས

ང་ནི་སྔར་བཞིན་བྱང་ཐང་གི་དུར་ཁྲོད་དེ་ཡིན

བརྩེ་ལྡིང་གི་ལག་ཟུང་སྔར་ནས་འཁྱགས་ཡོད་ཟེར་སྐད

རིག་འཛིན་བུ་མོའི་ཞལ་རས་སྔར་ནས་ནོགས་ཡོད་ཟེར་སྐད

ཀྱེ་ དེ་ནི་ཟེར་སྒྲོས་ཤིག་དང་རྟོག་བཏགས་ཀྱི་སྨུག་པ་འཁོར་བ་ཁོ་ན་སྟེ

དུར་ཁྲོད་ན་ད་དུང་གླིང་བུ་གཏོང་བའི་ན་གཞོན་ཡོད

ད་དུང་ཁ་སང་ལྟ་བུའི་རྨི་ལམ་ཡོད

ལག་ཟུང་འདར་འདར་གྱིས་དེ་རུ་བསྲིངས་ན

དེ་ན་མི་ཡུལ་གྱི་མིག་ཆུ་གཞལ་བའི་གཏམ་རྒྱུད་ཡོད

ལག་མཐིལ་གྱི་ཕྱི་ནང་གང་རུང་ནས

སྒྲ་དབྱངས་དང་ན་ཟུག་བསྡོངས་ཏེ་བཞུར་བ་མཐོང་དུས

བྱང་ཐང་གི་དུར་ཁྲོད་ན

རྒོད་པོ་འཕུར་བའི་ནམ་མཁའ་དང་ས་གཞི་ཡོད་པ་རྟོགས་པར་གྱིས་དང

མུད་པར་མི་འགྲོ་བའི་མྱི་ཁ་ནི་སེང་རས་ཀྱིས་བཏིམས་པའི་སེམས་པ་ཞིག་ཡིན་པ་མཁྱེན་སྲིད་དོ

ཐག་རིང་གི་ཕ་མ་དྲན་ཚུལ།

བྱམས་ལྡན་ཕ་མ་སེམས་ཀྱི་ནང་དུ་འཁོར་ཞིང་།།

སྐྱོ་གདུང་མཆི་མས་སེམས་པ་བཙོན་དུ་བཅུག་འདུག

ཕ་གིའི་མཚོའུ་འགྲམ་གྱི་བསིལ་ཁང་དེ་རུ།།

ཕ་མ་དྲན་པའི་སེམས་པ་ཡང་ཡང་ལུས་སོང་།།

འཕྲིན་དང་ཁ་པར་བར་གྱི་སྐད་ཆ་དག་གིས།།

ང་ཡི་དྲན་གདུང་སེལ་བའི་སྟ་གོན་བྱེད་བཞིན།།

ཡུན་རིང་མ་འཕྲད་ཕ་མའི་བསླབ་བྱ་ཀློག་དུས།།

ང་ཡི་སེམས་པ་མཆི་མའི་ས་གཞི་ཡིན་སོང་།།

མཐོངས་སུ་ལྡིང་སྐོར་རྒྱག་པའི་བྱ་ཆེན་དག་གིས།།

སྤྲིན་གྱི་བར་གསེང་ཕྲེད་དང་ཕྲེད་དུ་བཅད་དེ།།

སྣང་སྟོང་ཉམས་ཀྱི་གཤོག་སྒྲོ་བྲག་ལ་འཐོག་དུས།།

ང་ཡི་ངང་ཚུལ་འདི་དང་མཚུངས་པ་ཚོར་བྱུང་།།

རྒྱང་རིང་སྐད་ཆ་རྣ་བའི་དཔྱིད་དུ་སྨིན་ཞིང་།།

སྐྱོ་བ་ཤེད་ཀྱིས་སྟོང་བའི་དུས་ཚིགས་བསླེབས་པས།།

ཆུང་དུས་ལྟེ་ཁྲག་འཕོ་སའི་ཕ་ས་དྲན་བྱུང་།།

ཕ་སར་ང་ལ་སྒུག་པའི་ཕ་མ་དྲན་བྱུང་།།

སྐྱོ་བའི་སེམས་ལ་དྲན་པའི་ཆར་བ་བཏང་བྱུང་།།

སེམས་ཀྱི་ལྗོན་ཤིང་དྲང་མོ་ཆར་བས་བརླན་སོང་།།

རེ་འབྲས་ཤིང་ཏོག་འཐུ་བར་ད་དུང་འགོར་བས།།

རྒྱང་རིང་ཕ་མ་གཉིས་ལ་མཇལ་ཡུན་འཕྱིས་སོང་།།

དེ་ནས་ཉི་མ་ཚུར་འགྲོ་སེམས་ཀྱིས་སྐྱེལ་ཆོག།

འདི་ནས་ཟླ་བ་ཕར་འགྲོ་བརྩེ་བས་བསྒུལ་ཆོག

ཆུང་དུས་ཕ་མའི་གམ་གྱི་འཚོ་བ་མཐའ་དག།

འདི་ནས་རྨི་ལམ་གཅིག་གི་ཡུན་ལ་དྲན་ཆོག

དྲན་པའི་གཞུ་མོ་ཕ་དང་མ་ལ་ཕྱོགས་དུས།།

འདབས་ཀྱི་རི་ཆུ་ཀུན་གྱིས་སྐྱོའོ་ཟེར་བྱུང་།།

གདུང་ཚོར་ལྕི་མོས་མིག་ཆུ་རྡོག་གཅིག་ལྷུང་དུས།།

ས་དང་གཙང་པོ་ཐམས་ཅད་ཡོམ་ཡོམ་འདར་སོང་།

འཚོ་བའི་ངོ་གདོང་གང་སར་གཅིག་བུར་འགྲིམས་པས།།

ལམ་གྱི་དཀའ་བ་ཐམས་ཅད་འཕྲེད་ཀྱིས་བཅད་མོད།།

ཡབ་ཡུམ་ཐུགས་དང་འགལ་གྱིས་དོག་པ་ཞིག་གིས།།

བདག་གི་རྨི་ལམ་དྭངས་མོ་རབ་རིབ་ཆགས་སོང་།།

འཇབ་ཀྱིན་མི་ལོ་ཉེར་བདུན་མདུན་ལ་བསླེབས་ཤིང་།།

ཚ་ཚ་འུར་འུར་འཚོ་བའི་མི་ཚེ་བརྒལ་དུས།།

ཡབ་ཡུམ་གཉིས་པོ་སེམས་པ་འདི་ལ་འཐོག་བྱུང་།།

སེམས་ཀྱི་སྟེང་ལ་འགྱོད་པའི་རྨ་ཁ་ཤོར་སོང་།།

ཕ་མ་གཉིས་ཀྱིས་སྡུག་དང་དཀའ་བ་སྤྱད་དེ།།

བུ་ཡི་འདུན་མ་བཟང་བོའི་སྨོན་ལམ་འཁྱོངས་སྐད།།

འཇིག་རྟེན་མི་ཡི་འགྲོ་ལུགས་སྣ་ཚོགས་ཁྲོད་ནས།།

ཕ་མའི་ཐུགས་དང་འཚམས་པ་ཞུ་སྐལ་ཡོད་དམ།།

འགྲོ་ལམ་ཁད་ཀྱིས་བརྒལ་ནས་རི་ཁར་བསླེབས་སོང་།།

སྤྲིན་དང་སྨུག་པ་བོད་ཀྱི་ཡུལ་ལ་འཐིབས་འདུག།

ཕ་མའི་བྱམས་ཀྱིས་སེམས་ཀྱི་མཆི་མ་བསྐམས་ཤིང་།།

གཅེས་པའི་ཉམས་ཀྱིས་བུ་ཡི་ཞེ་སྡུག་བསལ་བྱུང་།

སྤྲིན་པ་དཀར་པོ་ཕ་མས་མངགས་པ་འདྲ་བྱུང་།།

འདི་སྣང་གྱེས་བྲལ་རིང་མོའི་རི་ཆེན་བརྒལ་དུས།།

རི་བོའི་ཟོམ་དུ་རྒྱ་མཚོའི་ཟོལ་གྱིས་འཕྱུར་སོང་།།

ཐང་གི་གཤོང་དུ་མཚེའུ་ཚུལ་གྱིས་ལྟེམས་སོང་།།

2011.2.1

ལམ་གྱི་ངལ་དུབ་སེལ་བའི་ཆང་།

མཚན་གྱི་སྨག་ལ་བགྲོ་བའི་ལམ་ཞིག་གནང་ནས།།
སྐར་ཚོགས་དཀྱིལ་ལ་ངལ་གསོའི་ལམ་ཞིག་ཕྱེ་ན།།
ང་ཡི་ཡོད་ཚད་སྤྲིན་དང་ཆར་བར་གྱུར་ནས།།
རྒྱུང་བཞུད་གྲོགས་ཀྱི་སེམས་ལ་བྱིལ་བྱིལ་གནང་ཆོག།།

དགུང་ཁའི་མུན་པ་འཇབ་ཀྱིན་འཇབ་ཀྱིན་བསླེབས་སོང་།།
རྩྭ་དང་ཆུ་འཁྱིལ་དཀྱིལ་ལ་ངང་བ་བབས་འདུག།།
དེ་རུ་སྐད་སྙན་སྒྲོགས་པའི་བྱ་ཞིག་མཐོང་བྱུང་།།
དེ་རུ་ཤིང་རྟ་འདེད་པའི་མི་ཡང་མཐོང་བྱུང་།།

རླུང་བུ་འཁྱགས་པས་སེམས་ཀྱི་དྲོད་ཐིགས་བསྡུས་ཤིང་།།
བྲལ་བའི་རྐྱེན་གྱིས་སེམས་ཀྱི་ཕྱག་ཟུང་ལྷོད་དུས།།
ངལ་གསོའི་སྟེགས་བུར་བཞག་པའི་ས་ཚིགས་རེ་ན།།
ང་ནི་ཆེད་དུ་འགྲེངས་པའི་དར་ལྕོག་དེ་ཡིན།།

ཁྱེད་ནི་དགོད་ཀྱིན་སླར་ཡང་རྨི་ལམ་རྨི་སྲིད།།
ཁྱེད་ནི་ངུ་བཞིན་སླར་ཡང་གྲོགས་པོ་དྲན་སྲིད།།
ཕྱི་ན་ཆར་བས་སྒྲོགས་པའི་ཤག་སྒྲ་ཐོས་དུས།།
ཁྱོད་ནི་སླད་མེད་སྔོན་གྱི་དེ་ག་ཡིན་ནོ།།

ཆོས་ཀྱི་རོལ་མོ་མི་ཡི་ངག་དང་འདྲིས་ཤིང་།།
དགོང་ཁའི་མཚམས་སྤྲིན་ཐལ་སྒྲའི་དབྱངས་སུ་བསྐྱིལ་དུས།།
སྔོན་ཆད་མཉམ་དུ་རོལ་སའི་དགོན་པ་མཐོང་བྱུང་།།
དགོན་གྲོང་དཀྱིལ་གྱི་ཤག་ཁང་ཆུང་ཆུང་མཐོང་བྱུང་།།

འདི་ནས་སྐལ་བ་བརྒྱ་རུ་སྨོན་ལམ་གཅིག་ཡིན།།
འདི་ནས་མི་ཚེ་གཅིག་ལ་འདུན་པ་གཅིག་ཡིན།།
འདི་ནས་ཁྱེད་ཀྱི་ཕྱོགས་ལ་རྒྱང་ལྟ་བྱས་ཏེ།།
སེམས་ཀྱི་སྐད་ཆ་འཕྲིན་གྱི་གཟུགས་སུ་ཕབ་ཆོག།།

སེམས་ཀྱི་འོད་ཁང་ཁ་ལ་མགྲོན་པོ་བསླེབས་འདུག།།
མགྲོན་གྱི་དགོད་སྒྲ་ས་གཞི་ཡོངས་ལ་ཁྱབ་འདུག།།
ངག་གི་སྒོ་མོར་ལུས་པའི་རྨི་ལམ་གཅིག་བུ།།
ཁྱོད་ཀྱི་ཕྱོགས་སུ་བཏང་ན་འདི་འདྲ་ཡིན་ནོ།།
ཞེས་པ་འདི་ནི་ང་དུར་ཁྲོད་དུ་འབོད་པས་བརྩེ་བའི་གྲོགས་རླུང་ཡོར་ལགས་རྒྱང་རིང་ར་ཤི་ཡའི་རྒྱལ་ཁབ་ཏུ་བསྐྱོད་དེ་རང་གི་འཁོས་ལ་དཔག་པའི་ལས་ཀ་ལས་དང་ལས་བཞིན་པར་འཕྲལ་ཕུགས་རྒྱང་གསུམ་ལ་སྨོན་ལམ་བཟང་པོའི་འདུན་པ་མཚོན་ཕྱིར་དང་། དེར་མ་ཟད་བྲལ་ནས་ལོ་གཅིག་གི་རིང་ཁ་པར་ཞིག་གཏོང་མ་ཐུབ་པར་དགོངས་དག་ཞུ་ཆེད་རྩོམ་འདི་འདྲ་ཞིག་སེམས་ཀྱི་ཚོར་གདུང་དང་སྦྱར་ཏེ་བྲིས་པ་ཡིན་ལ། སེམས་ཚོར་དྲག་པོ་འདི་དང་བསྡོངས་ཏེ་གྲོགས་པོ་ཉིད་ཀྱི་ཐུགས་ཀྱི་སྐྱོ་བ་མཐའ་དག་མི་དམིགས་པའི་དབྱིངས་སུ་ཞི་བ་དང་། དངོས་མཇལ་ལྟ་བུའི་དགའ་སྤྲོས་ཞལ་གྱི་པད་མ་ཡང་ཡང་དགོད་པར་ཤོག་ཅིག་གུ་ཞེས་སྔོན་གྱི་ལྷ་བཙན་པོའི་བླ་སྨན་དུང་གི་ཐོར་ཅོག་ཅན་ནས་རིམ་པར་བརྒྱུད་པའི་སྨན་པ་གཡུ་ཐོག་གསར་རྙིང་གི་ལུགས་བཟང་དགུང་དུ་འདེགས་པའི་འཚོ་བྱེད་རྒྱལ་པོའི་གདན་ས་འགྲོ་ཕན་སྨན་རྩིས་གླིང་གི་ལས་ཤག་ཏུ་ ༢0༡1.7.༡0 ཉིན་བྲིས་པའོ།།

དགེ་ཆོས་ཀྱི་རྩོམ་གསར་བ།

ཆོས་དང་འཇིག་རྟེན་གཉིས་མེད་སེངྒེའི་ལུས།།

ཆོས་མེད་སྤྱོད་པའི་སྤྲང་པོ་ང་འདྲ་ལ།།

ཆོས་གཏམ་སྨྲ་བའི་འོས་བབས་མ་མཆིས་ཀྱང་།།

ཆོས་ལྡན་རྗེ་བོའི་བཀའ་བཞིན་ཚིག་འགའ་ཞུ།།

སངས་རྒྱས་འཕྲིན་ལས་ཉི་མའི་འོད་ཟེར་དང་།།

སྔོན་སྨོན་བཟང་པོའི་ཆུ་ལུད་འཛོམས་པ་ལས།།

དགེ་བའི་ས་བོན་སྟོབས་ཤུགས་སྨིན་པ་ཁྱོད།།

མངའ་ཐང་རྒྱས་པའི་དཔོན་གྱི་རིགས་སུ་འཁྲུངས།།

དེས་ན་ཁམས་གསུམ་འགྲོ་བའི་བདེ་སྐྱིད་ཀུན།།

འབྱུང་བའི་སྒོ་མོ་སངས་རྒྱས་བསྟན་པ་ལ།།

སྒོ་གསུམ་འབད་པས་སྲི་ཞུ་སྒྲུབ་པ་འདི།།

ལས་སུ་བྱ་བ་ཀུན་གྱི་ཐོག་མ་ལགས།།

གང་དུ་མཁས་དང་གྲུབ་པ་བཞུགས་གྱུར་པ།།

དེ་ན་ལུང་དང་རྟོགས་པའི་བསྟན་པ་གནས།།

ཇི་སྲིད་བཤད་དང་སྒྲུབ་པའི་སྲོལ་གནས་པ།།

དེ་སྲིད་བར་དུ་དམ་པའི་སྐྱེས་བུ་འབྱུང་།།

དེས་ན་དྲི་མེད་བསྟན་པའི་པད་དཀར་ཚལ།།

བདེ་སྐྱིད་དབྱར་གྱི་དཔལ་དུ་གནས་པ་འདི།།

བློ་གསལ་ངང་མོའི་ཁྱུ་ཡིས་རབ་བརྟེན་པའི།།

འཆད་ཉན་འོ་མའི་ཆུ་མཚོ་ཉིད་ལ་རག།

སྡེ་སྣོད་འཆད་ཉན་བྱེད་པའི་མཁས་པ་དང་།།

དེ་དོན་ཉམས་སུ་ལེན་པའི་སྒོམ་ཆེན་གྱིས།།

བཀྲ་ཤིས་ལྷ་ཡི་སྒང་རྒྱུད་ཀུན་ཁྱབ་པའི།།

དགེ་འདུན་སྡེ་གཉིས་སྤེལ་བའི་མཛད་སྒོ་སྐྱོངས།།

མངའ་རིས་འབངས་ཀྱི་རི་བོ་མཐོན་པོའི་རྩེར།།

དཔལ་དང་འབྱོར་བའི་གངས་ཀྱི་ཅོ་པཎ་ལ།།

རྟག་ཏུ་གནས་པའི་མི་རྗེ་གདོང་ལྔ་པ།།

ཡངས་པའི་སྤྱན་གྱིས་ཕྱོགས་བཅུར་གཟིགས་པར་འཚལ།།

གཞན་ཕན་སྙིང་རྗེའི་སྣུམ་དང་བྲལ་བ་ཡི།།

རིག་འཕྲུལ་ཐབས་ཤེས་གློག་གི་སྒྲོན་མ་ཡིས།།

དྲང་པོའི་མི་ལ་འཁྱོག་པོའི་ལམ་སྟོན་པའི།།

སྐྲ་སེར་སྤྲེའུའི་རིགས་ལ་ཐུགས་ཟོན་འཚལ།།

ཐོས་བསམ་སྒོམ་པའི་ཞིང་ས་གཤིན་པོ་ལ།།

རང་རིག་རྟོགས་པའི་སྙེ་མ་རབ་འཁྲུངས་པའི།།

དམ་པའི་སྐྱེས་བུ་གང་དུ་བཞུགས་ཀྱང་རུང་།།

ཟོལ་མེད་གཙུག་གི་རྒྱན་དུ་འཛིན་པར་འོས།།

སྐྱ་སེར་གང་ཡང་མིན་པའི་ཆ་ལུགས་ལ།།

ཕྱི་ནང་གང་ཡང་མེད་པའི་ཆོས་ལུགས་ཅན།།

རྒྱ་བོད་བསྐོར་བའི་ཨ་མདོ་ང་འདྲའི་རིགས།།

སྐབས་འགར་དགྱེས་པའི་སྤྱན་གྱིས་བསྐྱངས་པར་འཚལ།།

ཞེས་འབྲུག་བཀྲིས་སྒང་རྫོང་དཔོན་འཕྲིན་ལས་འོད་ཟེར་གྱིས་ངོར་ཨ་མདོ་པ་དགེ་འདུན་ཆོས་འཕེལ་གྱིས་བྲིས་པའོ།།

ཟུར་མཆན། འབྲུག་པ་གྲོགས་པོ་ཞིག་གིས་མཁོ་སྤྲོད་གནང་བའི་རྩོམ་ཡིག་འདིའི་མ་ཕྱི་ལ་མཚན་བྱང་མེད་པས་༼མཁས་དབང་

དགེ་ཆོས་མཆོག་གི་སྙན་རྩོམ་གསར་པ་ཞིག་༽ཅེས་བྲིས་ནས་འགོད་རྒྱུར་ཕྲན་དོལ་སྨྱོན་གྱིས་རྒྱ་གར་ནས་སྤྱི་ཟླ་ ༨ ཚེས་ ༡༤ ལ་ཕུལ།