Sunday, July 17, 2011
12:14 AM
མི་ལོ་སུམ་ཅུའི་མི་ཚེའི་ཁྲལ་ལས་ཀྱེ་མ་ཤིན་ཏུ་རིང་བོ་ཡིན།།
གྲོགས་པོ་ཁྱོད་ཀྱིས་ལ་འདི་བརྒྱབ་སྟེ་ལུས་སེམས་ཉོབ་ཅིང་ཆད་ཡོད་ངེས།།
མྱུར་ཏུ་སྐེད་རགས་ལྷོད་ཀྱིས་བཤིགས་ཏེ་ང་དང་འཛོམས་བག་གཅིག་བྱེད་དམ།།
མིན་ན་བཞི་བཅུའི་ལ་རྒན་འཕྲེད་དུ་གཅོད་ལ་ད་ལྟ་བྲེལ་རྒྱུ་ཡིན།།
སྔོན་ནས་འདྲིས་པའི་སྙིང་གི་རུས་པ་ད་དུང་རྐང་གིས་བརྒྱན་ཡོད་དམ།།
ཡུན་རིང་མ་ཐུག་ཁ་ངོའི་མདངས་ལ་མིག་གི་མཆི་མས་བྱུགས་མེད་དམ།།
ཉོན་དང་སྔོན་ནས་བཏབ་པའི་ཁ་ཆད་ད་དུང་ད་ལྟ་གྲགས་བཞིན་འདུག།
ལྟོས་དང་ཐོག་མར་བརྒྱུས་པའི་དམ་ཚིག་དེ་རིང་ད་ལྟ་འགུལ་བཞིན་འདུག
ཁྱོད་རང་ཕྱིན་པའི་མི་ཡུལ་གཞན་དུ་དེ་དུས་ཁ་བ་བབས་ཡོད་ངེས།།
སེམས་ཀྱི་རྟེན་ས་ད་དུང་མ་རྙེད་སེམས་ཀྱི་ཁ་དོག་ནོགས་ཡོད་ཚོད།།
གླིང་ལ་འདྲིས་པའི་གྲོང་ཁྱེར་འདི་ནས་ཁྱོད་དང་འུ་གཉིས་ལྷན་དུ་འཛོམས།།
སེམས་ཀྱི་ཁ་བརྡ་ལྷོད་ཀྱིས་གློད་ན་འགྱངས་པའི་བསམ་པ་མཚོན་ནམ་ཅི།།
བྲལ་ཁར་བཞག་པའི་ལག་འཇུ་དེ་ནི་རང་གི་སེམས་ལ་ཉར་ཡོད་དམ།།
ལ་མོར་ཐུག་པའི་དམ་བཅའ་དེ་ཡང་ཚིག་གི་བརྡ་ལ་འཕྲོད་ཡོད་དམ།།
མི་འགའ་མྱི་ཁ་བཞིན་དུ་དེ་རིང་ཁྱོད་ཀྱི་མཐའ་རུ་རུབ་སྲིད་ཀྱང་།།
རྨི་ལམ་གཅིག་གི་རོལ་མྱོང་གོང་དུ་སྨུག་པ་བཞིན་དུ་དྭངས་ཀྱང་སྲིད།།
ཐམས་ཅད་སྐད་དུ་ཁྱོད་ཉིད་བོས་ཀྱང་ཐག་ནི་དེ་སུ་རིང་ཙམ་སྙམ།།
བར་གྱིས་ཆོད་དེ་སྐད་ཆ་དག་ནི་ཞེ་དྲག་གོ་བ་ཨེ་ཡོད་སྙམ།།
ལྷོད་ལ་འཁོར་བའི་ཉི་མ་དེ་ནི་དེ་རིང་ཡིན་ནམ་ཡིན་ནམ་སྙམ།།
གྲོགས་པ་ཁྱེད་ཀྱིས་དགོངས་པ་བཞེས་སམ་མི་འདུག་ལོ་མོར་བཞུད་དམ་ཅི།།
ཉི་མ་འདི་ནི་ཕ་ཀི་དེ་ནས་ནམ་ནམ་གཞར་གཞར་འཆར་བཞིན་འདུག།
ཟླ་བ་འདི་ནི་ཚུ་རོལ་འདི་ནས་ཡང་ཡང་འོར་འོར་ནུབ་བཞིན་འདུག།
རེ་བའི་གྲོགས་པོས་དགེ་བར་དགོངས་ཏེ་དམ་ཚིག་ཉིན་གཅིག་སྲུང་བའམ།།
ཕྱི་མིག་ཅིག་གིས་བདེ་མོ་བཞག་ཏེ་ཕེབས་སམ་ཅི་དགའ་དེ་ལྟར་མཛོད།།
