བདག་གི་རྨི་ལམ་དཀྲོགས་མྱོང་བའི་སྒྲོལ་མ།

ལྷ་སའི་སྒྲོལ་མ་ཆུ་རུ་བཞུར་སོང་།།

རིག་འཛིན་བཟང་མོ་ནུབ་དུ་ཕེབས་སོང་།།

དུར་ཁྲོད་ཁོ་བོ་ལྷོ་རུ་འཁྱམས་ཏེ།།

སེམས་ཀྱི་ཁོ་ཐག་སྔོན་ནས་ཆད་པས།།

དབེན་གནས་ཛ་ལན་དྷ་རའི་རི་ན།།

ང་ཡིས་སྙན་ངག་གླུ་རུ་བླངས་ཡོད།།

ད་ལོ་ཆར་འགོ་མ་བཙུགས་གོང་ལ།།

ནམ་མཁའ་སྔོ་ཞིང་དྭངས་པའི་ཉིན་ཞིག།

བདག་ལ་ཐག་རིང་ཐག་རིང་ཞིག་ནས།།

ཁ་པར་འབྱོར་བའི་དྲིལ་བརྡ་དཀྲོལ་སོང་།།

ཁྱོད་བདེ་འཚམས་འདྲི་མ་ཞུས་གོང་ལ།།

ང་སྡུག་ཅེས་ཟེར་ངུ་སྐད་བརྒྱབ་བྱུང་།།

རྒྱུས་ཡོད་སྐད་ལ་བསམ་བློ་བཏང་ན།།

ལྷ་སའི་ཁྲོམ་གྱི་སྒྲོལ་མ་ཡིན་འདུག།

ཡབ་ཡུམ་དབང་ཐང་བཙན་པས་ལན་ཟེར།།

རང་ལ་རང་དབང་མེད་པས་སྐྱོ་ཟེར།།

ལྷ་སའི་ཁྲོམ་གྱི་རྒྱུ་ཆེན་དེ་ལ།།

འགྲོ་འདོད་མེད་ཀྱང་བྱིན་ལུགས་གསུངས་བྱུང་།།

སྐྱོ་ཞིང་སྨུག་པ་འཐིབ་ཀྱིན་འོང་འདྲའི།།

སེམས་པ་དྲན་པས་ནང་དུ་བཀུགས་ཏེ།།

ཆུང་རོགས་སྒྲོལ་མའི་སེམས་ལ་འཚམས་པའི།།

ཚིག་གསུམ་མདུད་པ་ཡང་བསྐྱར་བཤིག་ཡོད།།

སྔོན་ལས་གར་ཡོད་རང་དབང་མེད་པས།།

ཧ་ཅང་སྐྱོ་བ་མ་བྱེད་ལབ་ཡོད།།

དྲན་དང་སྡུག་གི་བར་ཐག་གླེང་ནས།།

མཚན་གྱི་ཆུ་ཚོད་དགུ་བར་སླེབས་སོང་།།

མ་ཆོད་ངུ་སྐད་དལ་དལ་ལྷོད་ལྷོད།།

ལྷ་སའི་གཙང་བོའི་ནང་ལ་འདྲེས་ཐལ།།

སྐབས་དེར་སྟོང་ཞིང་ཤོར་བའི་སྣང་བ།།

ཡུལ་དང་འབྲལ་དུས་ལས་ཀྱུང་སྡུག་པ།།

སྔོན་ནས་བཅད་པའི་༡ཅེ་ནེ་ཁ་ནེ།།

དེ་རིང་མ་སྲོན་ཡང་བསྐྱར་ཟོས་པས།།

སྐྱོ་བའི་སྒང་ལ་སྐྱོ་བ་བསྣན་ཏེ།།

རྐང་པས་གཟུགས་པོ་ཁྱོགས་པ་མ་བྱུང་།།

མལ་སའི་ནང་ལ་ལྷེམ་སེ་ལྷུང་ཐལ།།

ལྡབ་ལྡིབ་ཁྲོད་དུ་ཡོད་ཚད་འཐིམ་ཐལ།།

ཞོགས་པ་ཡིན་བསམ་ཡར་ལ་ལངས་དུས།།

ཉིན་གུང་ཆུ་ཚོད་བཅུ་གཅིག་ལྷག་རེད།།

ཁ་ནང་གཙང་མ་མ་ཁྲུས་གོང་ལ།།

ཁ་པར་དྲིལ་བརྡ་སིར་སིར་གྲགས་སོང་།།

ཁ་པར་མི་འཇོག་རྒྱུ་མཚན་ཤོད་ཟེར།།

ག་ཚོད་བཏང་འདུག་རང་གིས་ལྟོས་ཟེར།།

འདི་ནི་ང་ཡི་གྲོགས་མོ་ཞིག་སྟེ།།

གཞན་གྱིས་དགའ་རོགས་རེད་ཅེས་གླེང་བའི།།

ཁམས་ཀྱི་རིག་འཛིན་བཟང་མོ་ཡིན་ནོ།།

ད་དུང་ལས་ཀྱི་འབྲེལ་བ་བྱུང་མེད།།

སྙིང་གཏམ་ཏོག་ཙམ་བཤད་བཞིན་ཡོད་མོད།།

ལས་འཕྲོ་ཡོད་མེད་ད་དུང་མི་ཤེས།།

ནང་ན་ཡོད་ན་ཡོང་གི་ཡིན་ཟེར།།

ཤ་དང་ཚལ་རིགས་ཉོ་ཡོང་ཟེར་གི།

མདང་ནུབ་སེམས་པ་མ་སྐྱིད་ཚུལ་དང་།།

རླངས་ཐབ་སྔོན་ནས་རྫོགས་རབས་བཤད་དེ།།

བདེ་ལེགས་ཟ་ཁང་ཡང་ཐོག་དེ་རུ།།

ཉིན་གུང་འཕྲད་པའི་ཁ་ཆད་བགོས་སོ།།

ཁམས་ཀྱི་བྲག་གཡབ་སྐྱིད་ཚུལ་ནས་བཟུང་།།

ཇོ་ཇོ་ཕྱི་རྒྱལ་ཡོད་པའི་བར་དུ།།

རིག་འཛིན་བཟང་མོས་ལན་གཅིག་བཤད་པས།།

ཕྱི་དྲོ་ཆུ་ཚོད་དྲུག་པར་ཟིན་འདུག།

རྗེས་མར་འབྲེལ་བ་མང་ཙམ་བྱོས་དང་།།

མཉམ་དུ་ནུབ་ལ་འགྲོ་ཆོག་ཟེར་གི།།

མཚན་དཀྱིལ་རང་ཤག་འཁྱག་པའི་ནང་དུ།།

ལས་ཀྱི་འགྱུར་བ་བསམ་བློ་བཏང་སྟེ།།

སྔོན་ནས་ད་ལྟའི་བྱུང་རབས་ཁག་ཅིག།

ནག་ཁུང་ནང་ནས་ལམ་ལམ་འཆར་གི།

ཕྱི་ལ་ཆར་བ་བརྒྱབ་པ་ནང་བཞིན།།

ནང་ལ་སྐྱོ་བ་དེ་འདྲ་ཆེ་སོང་།།

ད་ལོ་ཆར་མཇུག་མ་རྫོགས་སྔོན་ལ།།

རིག་འཛིན་ནུབ་ཕྱོགས་གླིང་ལ་འཕུར་སོང་།།

མི་རྐྱང་ཁྱོད་ལ་ཐུག་པའི་ཆེད་དུ།།

ཁ་པར་ཐེངས་མང་བཏང་ཡོད་གསུངས་བྱུང་།།

མ་སོང་སྔ་ཉིན་ཁྱེད་ཀྱི་སྒོ་རུ།།

ཆུ་ཚོད་བཞི་ལ་བསྒུགས་ཡིན་གསུངས་བྱུང་།།

ནུབ་ཕྱོགས་གླིང་གི་ཁ་པར་འདི་ཡིས།།

ང་ལ་ཚོར་བ་གང་འཚམས་སྤྲད་བྱུང་།།

དེ་རིང་ཞོགས་པ་སྔ་པོ་ལངས་ནས།།

གཙུག་ལག་ཁང་དུ་མྱུར་མོར་སོང་སྟེ།།

ང་དང་རིག་འཛིན་སྒྲོལ་མའི་བསམ་དོན།།

འགྲུབ་པར་བར་ཆད་མེད་པ་ཞུས་ཡོད།།

མཆན། ༡ཅེ་ནེ་ཁ་ནེ་རྒྱ་གར་གྱི་མྱོས་རྫས་ཤིག་སྟེ། ཐ་མག་དང་འདྲ་བར་བཟི་ཁ་ཅན་ཞིག་ཡིན་ནོ།

སྒྲོལ་མ་སེར་པོ།

ཉི་མ་རྒས་པའི་མདོག་དེ་ཁྱེད་ཀྱིས་དྲན་ནམ།།

སེམས་པ་དྲང་མོའི་གཟུགས་དེ་ཁྱེད་ཀྱིས་མཐོང་ངམ།།

ལར་ནས་འཁོར་བ་འདི་ཡི་ཕྱི་ནང་ཀུན་ཏུ།།

ལག་པ་རུམ་ལ་བཏང་འདྲའི་རྒྱུས་ཤིག་ཡོད་དམ།།

ང་ནི་ཁྱེད་ཀྱི་གམ་ལ་འདི་ལྟར་བཅར་རམ།།

ལག་པས་ཟིན་པའི་ཁ་ཕྱོགས་རྙེད་དུ་ཡོད་ན།།

ང་ནི་ད་དུང་གྲོང་པའི་ཆོས་ཀྱི་གོས་མེད།།

ཡ་ཀའི་བླ་མར་ཕུལ་བའི་ཆོས་གོས་དེ་ཡིན།།

ཁྱོད་ནི་ང་ཡི་འགྲམ་ལ་ཅི་ལྟར་བཅར་རམ།།

དུངས་པ་གཉོམ་པོ་ཞིག་གིས་རྒྱུས་ཡོད་བྱས་སམ།།

ཤ་འཇམ་ནང་གི་དྲོད་ཀྱིས་རྒྱུགས་ཤིག་གསུང་ངམ།།

སེམས་པ་སྲབ་སྲབ་ཅིག་གིས་འབོད་པ་བཏང་ངམ།།

ཕྱི་མིག་ཅིག་ཀྱང་མེད་ལ་འཇིག་རྟེན་འགྲོའོ།།

ཁྱེད་ཀྱིས་ང་ལ་བཅངས་པའི་བརྩེ་བ་འགྲོའོ།།

རྨི་ལམ་ཞིག་གི་རྔ་གཞུག་མཐོང་བར་གྱུར་ཀྱང་།།

ངས་ནི་ཁྱོད་ཀྱི་རེ་བ་མ་རེད་འདོད་ཀི།

ཁ་པར་ནང་གི་གཏམ་ནི་ཚེར་མ་ཞིག་ཡིན།།

རྨི་ལམ་ནང་གི་ཁྱོད་ནི་བསམ་གཞིགས་ཙམ་རེད།།

སྡེ་ཆེན་མྱི་ཁ་བརྒྱུད་ན་རླུང་གི་ཡང་ཡིན།།

དགོན་པར་གསོལ་བ་འདེབས་དུས་སྒྲོལ་མའི་གཟུགས་ཙམ།།

ན་ཟུག་དེ་ནི་སེམས་ཀྱི་གཏིང་ནས་འཕྱུར་སོང་།།

ལྗོན་པའི་གླུ་དབྱངས་སྒྲོག་པའི་དུས་དེ་ཡིན་སོང་།།

རྫ་གསེང་སྨུག་པས་ཅོ་འདྲི་བྱེད་པའི་གནས་སུ།།

སུ་དང་ཕྲད་པའི་སྨོན་ལམ་ཅི་འདྲ་བཏབ་བམ།།

ཁྱོད་ནི་འདི་འདྲའི་ལྷད་མེད་ལྷད་མེད་ཅིག་ཡིན།།

ད་དུང་དེ་འདྲའི་དྭངས་གཙང་དྭངས་གཙང་ཞིག་ཡིན།།

ལྷ་ཡི་མཆོད་པ་ངག་སུ་འདྲེན་པའི་བུ་མོ།།

ཞལ་རས་དེ་ལ་འཛུམ་མདངས་ཡོད་ན་མཛེས་ཨང་།།

འུ་གཉིས་ཐར་བ་སྐེད་ཀྱི་རི་ལམ་དེ་ཡིན།།

ཆོས་ཀྱི་གྲོང་ཁྱེར་མཐའ་དེའི་གྲོང་ཐོར་དེ་ཡིན།།

ལན་བུ་གཡུག་ཅིང་སྐེད་པ་ཕྲ་བའི་ཁྱོད་རང་།།

གསར་དུ་བསླེབས་པའི་མཁའ་སྤྱོད་སྒྲོལ་མ་དེའོ།།

ཞེན་པའི་ཐག་པ་དེ་རིང་ས་ལ་འཇོག་དགོས།།

དྲན་པའི་རི་མོ་དོ་ནུབ་ཤེད་ཀྱིས་གཅོག་དགོས།།

ཤ་འཇམ་ནང་འཇམ་པགས་འདྲེས་གཏིང་འདྲེས་ཤིག་གིས།།

མྱ་ངན་གོན་པའི་གོས་ལ་ཐང་ལ་ལྷུང་འགྲོ།

ཁྱེད་ཀྱིས་སྨོན་ལམ་འདི་འདྲ་ག་ཚོད་བཏབ་བམ།།

ང་ཡིས་རེ་བ་འདི་འདྲ་ཁྲི་ཕྲག་བྱས་མྱོང་།།

ཐག་རིང་ཐག་རིང་ཞིག་ནས་མཐོང་མཐོང་འདྲའམ།།

ཐག་ཉེ་ཐག་ཉེ་ཞིག་ཏུ་ཡོད་ཡོད་འདྲ་འམ།།

ཉོན་དང་བདག་གི་ནང་གི་གཅེས་པའི་བུ་མོ།།

ལྟོས་དང་མཁའ་སྤྱོད་ཞིང་གི་སྒྲོལ་མ་སེར་པོ།།

ཅུང་ཙམ་རིང་རྒྱུ་མེད་དོ་སེམས་ཀྱི་དཀྱིལ་ཡིན།།

བར་ཏུ་གཞན་ཞིག་མི་འགྲོ་སེམས་ཀྱི་ཁྱད་ཡིན།།

འབུལ་ན་ཕུལ་ས་མེད་དོ་རང་ལས་གཞན་མེད།།

བསྡད་ན་གཅིག་བུར་མི་ལྷག་མདུད་པ་གཅིག་ཡིན།།

གཅིག་ཏུ་མ་བཙེམས་ཚེམ་བུ་རྒྱག་མཁན་དེ་ཡིས།།

ལྷན་དུ་མ་བསྒྲིགས་ལྷུ་ལག་སྒྲིག་མཁན་དེ་ཡིས།།

ང་དུར་ཁྲོད་ཀྱིས་སྙིང་ཁྲག་ལྟ་བུའི་སྙན་ངག་གི་འཇིག་རྟེན་བསྔོགས་ཏེ་དམར་རྗེན་རྗེན་གྱི་ཚོར་བ་འདི་ཚིགས་བཅད་དུ་བསྡེབས་ཏེ་གྲོགས་པོ་ཁྱེད་ཅག་གི་མིག་སྔར་བཤམས་ཡོད་པས་དགའ་བའི་ངང་ནས་བཞེས་ཤིང་། ཚོར་བའི་ངང་ནས་ཉམས་སུ་ལོན་པར་སྨོན།

གྲོགས་པོ་ཞིག་དང་ཐུག་འཕྲད་བྱས་རྗེས།

གྲོགས་བསྟན་རབ་ལ་གླེང་བའི་ཁ་བརྡ།

སྟེས་དབང་གི་ཐུག་འཕྲད་ཅིག་གིས་ངས་རྩོམ་རིག་གླེང་བའི་གོ་སྐབས་རྙེད་ཡོད། དབྱངས་རྟའི་འདེགས་འཇོག་ཀྱིས་མིའི་སེམས་ཁམས་ལ་སྒུལ་ལྕོག་རྒྱག་པ་བཞིན། སྒྱུ་རྩལ་རྩོམ་རིག་གིས་ང་ཚོ་ཚོར་སྣང་གསར་བ་ཞིག་གི་ངོས་ནས་འཕྱོ་རུ་འཇུག་བཞིན་ཡོད། ནམ་རྒྱུན་རྩོམ་རིག་ལ་དོ་སྣང་ཡོད་པའི་ཀློག་མཁན་ཁ་ཤས་ཤིག་སྒྱུ་རྩལ་རྩོམ་རིག་གིས་སྡུག་ལ་གཏད་ལ་བཞིན་པ་མཐོང་ཡོད་ཚོད། བྱིས་དུས་ཀྱི་སེམས་ཁམས་ཀྱིས་གཉོར་བའི་སྒྱུ་རྩལ་རྩོམ་རིག་ནི་སྐུ་ཞབས་ཧེམ་རི་དེ་སའི་ཕུག་རོན་དེའི་གཤོག་པ་ཟུང་ཞེས་པའི་སྒྲུང་རྩོམ་དེའི་ཚབ་མཚོན་བྱས་ཆོག་སྙམ། གང་ལྟར་རྩོམ་རིག་སྒྱུ་རྩལ་གྱི་ལག་ཆ་མཐོར་འདེགས་བྱེད་དགོས་ན་ཚད་མཐོ་བའི་སྐད་ཆའི་སྒྱུ་རྩལ་ལ་བྱང་ཆུབ་དགོས་པ་རེད། གནའ་དུས་ཀྱི་རྩོམ་རིག་གྲགས་ཅན་གང་མང་ཞིག་དུས་རབས་ཉེར་གཅིག་ནང་ད་དུང་རྒས་མི་འདུག་པ་ནི་སྒྱུ་རྩལ་གྱི་ནུས་པ་སྟེ་ལང་ཚོའི་གཞོན་ཤ་འདི་ཡོད་པས་རེད། འཚོ་བ་དང་ཐག་ཉེ་སར་ཅི་ཙམ་བཅར་ཐུབ་པའི་ཚོད་ཀྱིས་ལོ་རྒྱུས་ཀྱི་རིན་ཐང་ཡོད་པའི་རྩོམ་རིག་གི་ས་བོན་འཇོག་སྲིད་པ་ཡིན་པས། གསར་སྐྱེས་རྩོམ་རིག་ལ་དོན་གཉེར་བྱེད་མཁན་ཚོས་སྒྱུ་རྩལ་གྱི་སྣང་བ་དེ་རང་བློས་དཔོག་ཚོད་ཙམ་དུ་བྱས་ཆོག་ཆོག་ཡོད། དཔེར་ན་རྩོམ་རིག་གི་རིན་ཐང་བསྐྱར་བཤད་ཅིག་བྱས་ན། ཁ་སང་གི་ལྕགས་མཚོན་དེ། ཉི་འོད་ཁྲོད་འགྱེལ་འདུག ཅེམ་གྱིས་ཅི་སྙམ་པའི་གཤིས་ཀ་འདི། འདི་ལྟ་བུའི་རྩོམ་རིག་འགོ་བརྩམས་མ་ཐག་ནས་ཁ་སང་དང་ཅེམ་ལྟ་བའི་བྱ་དངོས་ཀྱི་འགྱུར་ལྡོག་དང་ངོ་ཤེས་རྙིང་པ་ཞིག་ལེ་ཡིན་སྙམ་པའི་རྩོམ་གཞི་སྤྱིའི་རིན་ཐང་ཞིག་གསར་དུ་བསྐྲུན་བཞིན་ཡོད་པ་ནི། ཅིས་ཀྱང་དོ་སྣང་བྱེད་དགོས་ས་ཞིག་དང་གནད་འགག་ཅན་ཞིག་ཡིན་པ་རེད། བྱ་དངོས་ཀྱི་འགྱུར་བ་དང་འབུར་དུ་དོད་པའི་སྐད་ཆའི་སྒྱུ་རྩལ་རེ་རེ་བློ་ངོར་ཤར་ཚེ་རྩོམ་འདི་ནི་ང་ལ་བྲིས་འདུག་སྙམ་པའི་དོགས་པ་ཡང་འབྱུང་སྲིད་པ་རེད། འཚོ་བ་དང་ཧ་ཅང་ཐག་ཉེ་བའི་ཞིབ་འཇུག་རིག་པ་འདི་དང༌། རྩོམ་རིག་དངོས་བསྟན་གྱི་སྣང་བརྙན་གསོན་པོ་དག་གིས་ཁྱོད་རང་གང་ཞིག་ཏུ་ཁྲིད་འགྲོ་བ་རྟོགས་ཚེ་ཁྱོད་ཀྱིས་སྒྱུ་རྩལ་རྩོམ་རིག་ལ་གོ་བ་ཞིབ་མོ་ཞིག་རྒྱག་ཐུབ་ངེས་པས། ཅིས་ཀྱང་རྩོམ་རིག་ལ་དོ་སྣང་བྱེད་རོགས། རང་གི་ཆེད་དུ་དང་འཚོ་བའི་ཆེད་དུ་རྩོམ་རིག་ལ་དོ་སྣང་བྱས་དང༌། འཚོ་བ་ལ་དགོས་མཁོ་སྣ་མང་ཞིག་ཡོད་པས་གཅིག་མིན་ན་གཅིག་གི་ཁ་སྐོང་བར་འགྱུར་ངེས།

སྒྱུ་རྩལ་རྩོམ་རིག་ནི་ཅི་ཞིག་ཡིན

སྟེས་དབང་གི་ཐུག་འཕྲད་ཅིག་གིས་ངས་རྩོམ་རིག་གླེང་བའི་གོ་སྐབས་རྙེད་ཡོད། དབྱངས་རྟའི་འདེགས་འཇོག་ཀྱིས་མིའི་སེམས་ཁམས་ལ་སྒུལ་ལྕོག་རྒྱག་པ་བཞིན། སྒྱུ་རྩལ་རྩོམ་རིག་གིས་ང་ཚོ་ཚོར་སྣང་གསར་བ་ཞིག་གི་ངོས་ནས་འཕྱོ་རུ་འཇུག་བཞིན་ཡོད། ནམ་རྒྱུན་རྩོམ་རིག་ལ་དོ་སྣང་ཡོད་པའི་ཀློག་མཁན་ཁ་ཤས་ཤིག་སྒྱུ་རྩལ་རྩོམ་རིག་གིས་སྡུག་ལ་གཏད་ལ་བཞིན་པ་མཐོང་ཡོད་ཚོད། བྱིས་དུས་ཀྱི་སེམས་ཁམས་ཀྱིས་གཉོར་བའི་སྒྱུ་རྩལ་རྩོམ་རིག་ནི་སྐུ་ཞབས་ཧེམ་རི་དེ་སའི་ཕུག་རོན་དེའི་གཤོག་པ་ཟུང་ཞེས་པའི་སྒྲུང་རྩོམ་དེའི་ཚབ་མཚོན་བྱས་ཆོག་སྙམ། གང་ལྟར་རྩོམ་རིག་སྒྱུ་རྩལ་གྱི་ལག་ཆ་མཐོར་འདེགས་བྱེད་དགོས་ན་ཚད་མཐོ་བའི་སྐད་ཆའི་སྒྱུ་རྩལ་ལ་བྱང་ཆུབ་དགོས་པ་རེད། གནའ་དུས་ཀྱི་རྩོམ་རིག་གྲགས་ཅན་གང་མང་ཞིག་དུས་རབས་ཉེར་གཅིག་ནང་ད་དུང་རྒས་མི་འདུག་པ་ནི་སྒྱུ་རྩལ་གྱི་ནུས་པ་སྟེ་ལང་ཚོའི་གཞོན་ཤ་འདི་ཡོད་པས་རེད། འཚོ་བ་དང་ཐག་ཉེ་སར་ཅི་ཙམ་བཅར་ཐུབ་པའི་ཚོད་ཀྱིས་ལོ་རྒྱུས་ཀྱི་རིན་ཐང་ཡོད་པའི་རྩོམ་རིག་གི་ས་བོན་འཇོག་སྲིད་པ་ཡིན་པས། གསར་སྐྱེས་རྩོམ་རིག་ལ་དོན་གཉེར་བྱེད་མཁན་ཚོས་སྒྱུ་རྩལ་གྱི་སྣང་བ་དེ་རང་བློས་དཔོག་ཚོད་ཙམ་དུ་བྱས་ཆོག་ཆོག་ཡོད། དཔེར་ན་རྩོམ་རིག་གི་རིན་ཐང་བསྐྱར་བཤད་ཅིག་བྱས་ན། ཁ་སང་གི་ལྕགས་མཚོན་དེ། ཉི་འོད་ཁྲོད་འགྱེལ་འདུག ཅེམ་གྱིས་ཅི་སྙམ་པའི་གཤིས་ཀ་འདི། འདི་ལྟ་བུའི་རྩོམ་རིག་འགོ་བརྩམས་མ་ཐག་ནས་ཁ་སང་དང་ཅེམ་ལྟ་བའི་བྱ་དངོས་ཀྱི་འགྱུར་ལྡོག་དང་ངོ་ཤེས་རྙིང་པ་ཞིག་ལེ་ཡིན་སྙམ་པའི་རྩོམ་གཞི་སྤྱིའི་རིན་ཐང་ཞིག་གསར་དུ་བསྐྲུན་བཞིན་ཡོད་པ་ནི། ཅིས་ཀྱང་དོ་སྣང་བྱེད་དགོས་ས་ཞིག་དང་གནད་འགག་ཅན་ཞིག་ཡིན་པ་རེད། བྱ་དངོས་ཀྱི་འགྱུར་བ་དང་འབུར་དུ་དོད་པའི་སྐད་ཆའི་སྒྱུ་རྩལ་རེ་རེ་བློ་ངོར་ཤར་ཚེ་རྩོམ་འདི་ནི་ང་ལ་བྲིས་འདུག་སྙམ་པའི་དོགས་པ་ཡང་འབྱུང་སྲིད་པ་རེད། འཚོ་བ་དང་ཧ་ཅང་ཐག་ཉེ་བའི་ཞིབ་འཇུག་རིག་པ་འདི་དང༌། རྩོམ་རིག་དངོས་བསྟན་གྱི་སྣང་བརྙན་གསོན་པོ་དག་གིས་ཁྱོད་རང་གང་ཞིག་ཏུ་ཁྲིད་འགྲོ་བ་རྟོགས་ཚེ་ཁྱོད་ཀྱིས་སྒྱུ་རྩལ་རྩོམ་རིག་ལ་གོ་བ་ཞིབ་མོ་ཞིག་རྒྱག་ཐུབ་ངེས་པས། ཅིས་ཀྱང་རྩོམ་རིག་ལ་དོ་སྣང་བྱེད་རོགས། རང་གི་ཆེད་དུ་དང་འཚོ་བའི་ཆེད་དུ་རྩོམ་རིག་ལ་དོ་སྣང་བྱས་དང༌། འཚོ་བ་ལ་དགོས་མཁོ་སྣ་མང་ཞིག་ཡོད་པས་གཅིག་མིན་ན་གཅིག་གི་ཁ་སྐོང་བར་འགྱུར་ངེས།

བྱ་རྒོད་ཀྱི་འཕུར་སྐྱོད།

མཚོན་དང་དྲག་ཆར་གྱི་ཀློང་ན

སུས་ཀྱང་སེམས་ལ་མ་དྲན་པའི་རྒྱ་སྙི་ཞིག

གདུག་རྩུབ་ཀྱི་སེམས་པ་དེའི་ཁ་དོག་ཅི་འདྲའི་ནག་པོ་ཞིག་རེད་ཨང

དྲན་འདུན་གྱི་སྒྲོན་མེ་དེ་ཇི་ལྟར་གསལ་ན་ཡང

མཐའ་དང་དབུས་ཀྱི་དཀྱིལ་འཁོར་གསལ་མ་ཐུབ་རྐྱེན

ཨུ་ཚུགས་ཀྱིས་བསྐྱངས་པའི་ནམ་ཟླ་འདི་དོན་ངོ་མ་སུ་ཞིག་ལ་དབང

གནས་འདི་ན་སུ་ལ་ཡང་གཉའ་སྒ་བསྟད་ཆོག་པའི་དབང་ཆ་ཞིག་མེད་མོད

བླུན་རྨོངས་ཀྱི་ཚོགས་སྡེའི་ནང་ནས

ང་རྒྱལ་གྱི་རང་གཤིས་ཤིག་ལྷང་ལ་འབུད་བཞིན་པ་འདི

དོན་ངོ་མ་སུ་ཞིག་ཡིན

བྲན་གཡོག་སྤྱི་ཚོགས་རོ་ལངས་རྒྱག་པའི་སྔ་སྟས་ཤིག་གིས

ངའི་གཞིས་ཁྱིམ་འདི་ན་ཡང་མི་ཉན་མི་ཆོག་པའི་བཀའ་རྒྱ་ཇི་འདྲ་མང་པོ་ཞིག་ཡོད་པ་རེད་ཨང

ཡིན་ནའང་ཉི་གཞོན་གྱི་ཐུ་འོག་འདི་ནས་

སུ་ལ་ཡང་སྐྲག་སྣང་མེད་པར

ཁྱོད་དང་ང་ད་དུང་ཁོ

དམར་པོ་མེ་ལྕེ་བཞིན་འབར་ལ་འགྲོ

དྭངས་གཙང་ཆུ་མོ་བཞིན་བཞུར་ལ་འགྲོ

འུ་ཚོས་ཁོད་ཡངས་བའི་འཇིག་རྟེན་ཞིག་གི་སྒོ་གླེགས་རྡུང་བཞིན

འུ་ཚོས་མཐའ་མེད་པའི་རང་དབང་ཞིག་གི་སྒེའུ་ཁུང་ཕྱེས་ནས

བླུན་རྨོངས་ཀྱི་ཚོགས་སྡེ་འདིར་ངོ་རྒོལ་བྱེད

གང་ན་གཉའ་གནོན་དང་བཙན་ཤུགས་ཡོད་ན

དེ་ན་ངོ་རྒོལ་དང་དམག་འཁྲུགས་ཡོད

འུ་ཚོས་འདི་ལྟ་བུའི་གནས་ལུགས་ཀྱི་རྒྱབ་ལྗོངས་འཚོལ་བཞིན

འུ་ཚོས་བཙན་གྱིས་བཅིངས་བའི་ལྕགས་སྒྲོག་འདི་ཤུགས་ཀྱིས་གཅོད་ཀྱིན

འདྲ་མཉམ་དང་གུ་ཡངས་ཀྱི་བཞེངས་བའི་འཇིག་རྟེན་དེར་མཉམ་དུ་འགྲོ

འུ་ཚོ་ནི་ཉི་འོད་འཐུང་བའི་བྱ་ཁྱུ་ཞིག་ཡིན་པ་བདེན་ན

ཕ་མས་གནང་བའི་གཤོག་པ་འདི་མཁའ་དབྱིངས་སུ་ཤུགས་ཀྱིས་བཏེགས་ཏེ

ཉི་འོད་བསྒྲིབས་པའི་སྤྲིན་པ་དེ་ཚོ་ཡུན་གྱིས་གཤགས་ཚེ

དབང་བསྒྱུར་མེད་པའི་རིན་ཐང་ཞིག་གི་སྟོབས་ཤུགས་རྙེད་ངེས

དེ་དུས་ཁྱོད་དང་ང་ལ་ཡབ་མེས་གོང་མའི་གནང་བའི་ང་རྒྱལ་འདིས

ལས་དབང་ལྟ་བུའི་བཙན་རྫོང་མཐུག་པོ་དག་ཀྱང

རང་ཉིད་ཀྱི་རྐང་འོག་ཏུ་བརྫིས་ཆོག་པ་ཁོ་ཚོས་ཚོར་ལེ་ཡོད

སྤྱི་ཟླ་གསུམ་པ་གླེང་བ།

སྒེའུ་ཁུང་གི་ཤེལ་ངོས་ནས་ཕྱི་ལོགས་སུ་ལྟ་ཐེངས་རེར

ཆར་བ་འབབ་ཀྱིན་འདུག

རྒྱ་ལམ་གྱི་ནང་དུ་མི་རེ་ཟུང་ལས་མི་འདུག་མོད

འབྲུག་སྒྲ་དེས་སུ་ཞིག་ལ་དམག་འཐབ་བྱེད་པ་བཞིན

ཡུལ་ལུང་དེའི་མཐའ་དབུས་བར་གསུམ་ནས་ཤུགས་ཀྱིས་གྲགས་སོང

ལན་རེར

ཆར་བ་ལ་སུན་སྣང་སྐྱེ་ཞིང

རློན་དྲི་ཁ་བའི་གོན་པ་དེ་དག་རང་ཉིད་ཀྱི་མིན་ན་སྙམ

ཡིན་ནའང་སང་ཉིན་གྱི་ཉི་མ་དྲོན་པོ་དེ་བསམ་ན

རང་ཉིད་རྒྱལ་སོང་བའི་སྣང་བ་ཞིག་དང་ལྷན་སྔོན་ཆད་ཀྱི་སུན་སྣང་དེ་ཡང་རིམ་གྱིས་འཇགས་སོང

རྨི་ལམ་ཐུན་གཅིག་གི་རྗེས་ནས

ངས་དྲན་འོས་པ་མང་པོ་ཞིག་ལ་ཁ་པར་གཏོང་འདོད་བྱུང

བདེ་མོ། ཁྱེད་ཚོ་བདེ་མོ་ཡིན་ནམ

ངས་སྐད་ཆ་དེ་ཕར་བཤད་མ་ཐག་ཨ་ཞང་གིས

དོན་དག་གལ་ཆེན་མེད་ན་ཁ་པར་མ་གཏོང་ད་ལོ་ཡང་ང་བརྒྱད་དང་་་་་་་་་་་་་་

སྐད་ཆ་དེའི་མཇུག་མ་རྫོགས་གོང་ཁ་པར་ཆད་སོང་མོད

ཕ་ཡུལ་དུ་དོན་རྐྱེན་ངན་པ་ཞིག་བྱུང་བ་གསལ་བོ་རེད

ཆར་བ་ད་དུང་འབབ་ཀྱིན་འདུག

མི་ཚོགས་ཀྱི་མིག་ཆུ་ལྟ་བུའི་གདུང་ཡུས་ཤིག་དང་ལྷན་དུ་འབབ་བཞིན་འདུག

སྐབས་དེར་གྲང་ཤུར་ཤུར་གྱི་ཆར་བ་དེས་སུ་ཞིག་ལ་མྱ་ངན་བྱེད་པ་ལྟར

ཤུགས་ཆེན་པོས་བབས་སོང

ཟོ་ཆེན་ཞིག་ནས་ཆུ་འཕོ་བ་ལྟར་བབས་སོང་བས

ཁང་བ་གཡར་མ་དེ་ནས་ཐིགས་ཆུ་ཟགས་འགོ་བརྩམས

རེ་རེ་བྱས་ནས་སེམས་པའི་གཏིང་དུ་ལྷུང་དུས

ངས་ད་དུང་ཕ་ཡུལ་གྱི་དོན་རྐྱེན་དེ་བརྗེད་ཀྱི་མེད